Şuşa bu gün təkcə Azərbaycanın mədəniyyət paytaxtı deyil, həm də beynəlxalq dialoqun, qlobal əməkdaşlığın və strateji baxışların müzakirə olunduğu mühüm platformaya çevrilmişdir. IV Şuşa Qlobal Media Forumu da bu baxımdan xüsusi əhəmiyyət daşıyır. Forum çərçivəsində Azərbaycan Respublikasının Prezidenti İlham Əliyevin çıxışı ölkənin xarici siyasət prioritetlərini, enerji strategiyasını, regional təhlükəsizlik məsələlərini, rəqəmsal transformasiya istiqamətlərini və medianın müasir dünyadakı rolunu əhatə edən mühüm mesajlarla yadda qaldı.
Prezident İlham Əliyev çıxışında Azərbaycanın beynəlxalq münasibətlər sistemində etibarlı tərəfdaş kimi formalaşdığını vurğulayaraq bildirdi ki, ölkəmiz müxtəlif beynəlxalq platformalarda qarşılıqlı etimadın yaradılmasına mühüm töhfələr verib. Xüsusilə Qoşulmama Hərəkatına sədrliyi dövründə Azərbaycanın nümayiş etdirdiyi fəaliyyət beynəlxalq ictimaiyyət tərəfindən yüksək qiymətləndirilib və sədrliyin yekdil qərarla daha bir il uzadılması ölkəmizə olan etimadın göstəricisi olmuşdur. Prezident qeyd etdi ki, məhz bu etimad COP29 çərçivəsində mürəkkəb məsələlərin razılaşdırılmasına da mühüm dəstək verib.
Forumda Azərbaycanın enerji təhlükəsizliyi sahəsində qazandığı nailiyyətlərə də geniş yer ayrıldı. Dövlət başçısı vurğuladı ki, Azərbaycan artıq Almaniya və Avstriya da daxil olmaqla 16 ölkəyə təbii qaz ixrac edir və boru kəmərləri vasitəsilə qaz ixrac edən ölkələr arasında coğrafi əhatəsinə görə lider mövqedədir. Yeni qaz yataqlarının işlənməsi, "ACG Deep Gas" layihəsinin icrası və hasilatın artırılması ölkənin enerji ixrac potensialını daha da gücləndirəcək. Bununla yanaşı, Avropa bazarında artan tələbat mövcud nəqliyyat infrastrukturunun genişləndirilməsini zəruri edir.
Prezident İlham Əliyev çıxışında bərpaolunan enerji istiqamətində görülən işlərdən də bəhs etdi. Bildirildi ki, 2032-ci ilədək Azərbaycanda 8 giqavat bərpaolunan enerji istehsal gücünün yaradılması planlaşdırılır. Qarabağ bölgəsində artıq yüzlərlə meqavat gücündə su elektrik stansiyaları istifadəyə verilib, yaxın illərdə isə yeni günəş elektrik stansiyalarının fəaliyyətə başlaması nəzərdə tutulur. Bu layihələr enerji təhlükəsizliyini möhkəmləndirməklə yanaşı, ixrac imkanlarını da artıracaq.
Forumun mühüm mövzularından biri də regional sülh prosesi idi. Prezident İlham Əliyev Azərbaycan ilə Ermənistan arasında sülh sazişinin əldə olunması istiqamətində görülən işlərdən danışaraq bildirdi ki, uzun illər davam edən münaqişədən sonra region üçün yeni əməkdaşlıq imkanları yaranır. Dövlət başçısı vurğuladı ki, sülh yalnız beynəlxalq hüquqa əsaslandıqda davamlı ola bilər və Azərbaycanın mövqeyi hər zaman ölkələrin suverenliyi, ərazi bütövlüyü və sərhədlərinin toxunulmazlığı prinsiplərinə söykənmişdir. O qeyd etdi ki, Azərbaycan öz suverenliyini bərpa etdikdən sonra müharibəni davam etdirməmiş, məsuliyyətli davranaraq regionda uzunmüddətli sabitliyin formalaşmasına üstünlük vermişdir.
Çıxışın diqqət çəkən istiqamətlərindən biri rəqəmsal transformasiya və süni intellekt idi. Prezident İlham Əliyev bildirdi ki, ölkədə bu sahənin koordinasiyası məqsədilə xüsusi komissiya və vahid işçi qrupu yaradılıb. Süni intellekt texnologiyalarının tətbiqi, rəqəmsal iqtisadiyyatın inkişafı və innovativ idarəetmə mexanizmlərinin genişləndirilməsi Azərbaycanın uzunmüddətli inkişaf strategiyasının əsas prioritetlərindən biridir. Bu yanaşma dövlət idarəçiliyində səmərəliliyin artırılması ilə yanaşı, informasiya cəmiyyətinin daha da inkişafına xidmət edir.
Prezident çıxışında beynəlxalq hüququn aliliyinin vacibliyini xüsusi vurğulayaraq qeyd etdi ki, dayanıqlı sülh yalnız ədalət və beynəlxalq hüquq prinsipləri əsasında qurula bilər. Azərbaycanın uzun illər müharibə şəraitində yaşadığını xatırladan dövlət başçısı bildirdi ki, ölkəmiz bu gün sülhün inkişaf, investisiya və regional əməkdaşlıq üçün yaratdığı imkanları yaxından görür. Onun fikrincə, regionun gələcəyi qarşıdurmada deyil, əməkdaşlıq və qarşılıqlı etimad mühitində qurulmalıdır.
Forum zamanı medianın rolu da xüsusi diqqət mərkəzində idi. Prezident İlham Əliyev vurğuladı ki, müasir dövrdə media yalnız xəbərləri çatdıran vasitə deyil, həm də beynəlxalq ictimai rəyin formalaşmasına təsir göstərən mühüm platformadır. Xüsusilə insan hüquqları, dezinformasiyaya qarşı mübarizə, beynəlxalq ədalət və müstəmləkəçilik problemlərinin işıqlandırılmasında müstəqil və məsuliyyətli medianın fəaliyyəti böyük əhəmiyyət daşıyır. Onun sözlərinə görə, jurnalistlər qlobal problemlərin obyektiv işıqlandırılmasında daha fəal və prinsipial mövqe nümayiş etdirməlidirlər.
Prezident İlham Əliyev çıxışının sonunda Azərbaycanın gələcək inkişaf prioritetlərini də açıqladı. Dövlət başçısı qeyd etdi ki, ölkənin əsas məqsədi müdafiə qabiliyyətinin gücləndirilməsi, milli maraqların qorunması, enerji və nəqliyyat layihələrinin genişləndirilməsi, rəqəmsal inkişafın sürətləndirilməsi və mümkün qədər çox ölkə ilə qarşılıqlı faydalı əməkdaşlıq əlaqələrinin qurulmasıdır. Azərbaycanın bütün təşəbbüslərinin mərkəzində isə sülh, sabitlik və beynəlxalq əməkdaşlıq dayanır.
IV Şuşa Qlobal Media Forumu bir daha nümayiş etdirdi ki, Azərbaycan qlobal proseslərdə fəal iştirak edən, regional əməkdaşlığa töhfə verən və beynəlxalq hüququn prinsiplərinə əsaslanan siyasət həyata keçirən dövlətdir. Prezident İlham Əliyevin forumdakı çıxışı ölkənin strateji inkişaf istiqamətlərini, regional sülhə sadiqliyini və müasir dünyanın çağırışlarına uyğun inkişaf modelini əks etdirən mühüm siyasi sənəd kimi qiymətləndirilə bilər.
Əhmədova Gülxarə
Naxçıvan Muxtar Respublikası Ali Məclisinin deputatı
