Mixail Saakaşvili öz partiyasının – Yeni Qüvvələr Hərəkatının Ukraynada keçiriləcək parlament seçkisində iştirakını dayandırıb.
GunAz.az xəbər verir ki, bu məlumatı Saakaşvili öz Feysbuk səhifəsində paylaşıb. Saakaşvili partiyasının tərəfdarlarını Vladimir Zelenskinin partiyasına səs verməyə səsləyib:
“Mənim artıq suallarım peyda olub, amma düşünürəm ki, Prezident Zelenskiyə çoxluğu formalaşdırmaq üçün şans vermək lazımdır. Ona görə də hazırda hər faiz önəmlidir”, - deyə o bildirib.
Saakaşvili partiyasının toplayacağı səslərin Zelenskiyə mane olmasını istəmədiyini deyib.
Qeyd edək ki, Ukraynada parlament seçkisi oktyabrda baş tutacaq. Sonuncu rəy sorğularına əsasən, əhalinin 49,5%-i parlament seçkisində Zelenskinin Xalqın Xidmətçisi Partiyasını dəstəkləməyə hazırdır. Ondan sonrakı yerlərdə Yuri Boykonun Müxalifət Platformu (10,5%), Pyotr Poroşenkonun Avropa Həmrəyliyi (7,7%), Yuliya Timoşenkonun Batkivşina (6,9%) və Svyatoslav Vakarçukun Səs partiyaları (5,9%) qərarlaşıb. Saakaşvilinin partiyası da daxil olmaqla digər partiyaların hər birinin səs faizi isə 5%-dən az olub.
N.SAFURA
