Ədliyyə Nazirliyi Mətbuat xidmətinin məlumatına görə bəzi xəbər portallarında 2019-cu il 26 fevral tarixində "İcra məmuru rüşvət maddəsi ilə həbs edildi" mövzusunda yazılarda Şabran rayon icra və probasiya şöbəsinin guya hazırda icra məmuru vəzifəsində çalışan N.Məstanovla bağlı dəqiqləşdirilməmiş məlumatlar dərc edilmiş, təhrifə yol verilmişdir.
Bildirilir ki, əvvəllər qeyd olunan vəzifədə işləmiş N.Məstanov xidməti vəzifəsinin icrası zamanı kobud qanun pozuntularına yol vermiş, o cümlədən borclu ilə xidmətdənkənar münasibətə girməklə korrupsiya hüquqpozması təəssüratı yaradan əməl törətmişdir. Dövlətimizin korrupsiyaya qarşı mübarizədə qəti siyasi iradəsinə uyğun olaraq Ədliyyə Nazirliyi belə hallarla bağlı daim barışmaz mövqe tutur. Buna görə N.Məstanova qarşı ən ciddi tədbirlər görülərək, Ədliyyə Nazirliyi üzrə 13.11.2018-ci il tarixli Əmrlə o, ədliyyə orqanlarından xaric edilmiş və araşdırma materialları məhz nazirlik tərəfindən hüquqi qiymət verilməsi üçün Baş Prokurorluğa göndərilmişdir. Baş prokuror yanında Korrupsiyaya qarşı Mübarizə Baş İdarəsi tərəfindən N.Məstanovun təqsirləndirilməsinə dair cinayət işi məhkəməyə göndərilmiş və onun barəsində yazıda qeyd olunduğu kimi həbs deyil, "polisin nəzarəti altına vermə" qətimkan tədbiri seçilmişdir.
