23 yanvarın GÜNDƏMİ

23 yanvar həm Azərbaycan, həm də dünya tarixi üçün bir sıra taleyüklü məqamlarla yadda qalıb.

Azərbaycan tarixində 23 yanvar

-1990-cı il: Azərbaycan SSR Ali Sovetinin fövqəladə sessiyası. Qanlı Yanvar hadisələrindən dərhal sonra çağırılan bu sessiyada Bakıdan qoşunların çıxarılması və fövqəladə vəziyyətin ləğvi barədə qərarlar qəbul edildi. Respublika rəhbərliyi sessiyada iştirak etmədiyindən, bu iclas xalqın iradəsini əks etdirən mühüm siyasi addım idi.

-1992-ci il: ABŞ Azərbaycanın müstəqilliyini tanıdı. ABŞ dövləti rəsmən Azərbaycan Respublikasının dövlət müstəqilliyini tanıdığını bəyan etdi.

-1992-ci il: Ukrayna ilə diplomatik təmas. Ukrayna tərəfi Azərbaycana nota göndərərək diplomatik münasibətlər qurmaq niyyətini bildirdi (fevralın 6-da rəsmiləşib).

-1993-cü il: Azərbaycan Respublikası ilə Çexiya arasında diplomatik əlaqələr yaradıldı.

-2011-ci il: Bakının "İnter" (indiki "Keşlə") futbol klubu Sankt-Peterburqda keçirilən Birlik Kubokunu qazandı.

Dünya tarixində 23 yanvar

-1556-cı il: Şensi zəlzələsi (Çin). Bəşər tarixinin ən dağıdıcı zəlzələsi baş verib. Təxminən 830 min insanın həyatına son qoyan bu fəlakət "ən çox insanın həlak olduğu zəlzələ" kimi tarixə düşüb.

-1849-cu il: Elizabet Blakvel tibb dərəcəsi alan dünyanın ilk qadın həkimi oldu.

-1922-ci il: Şəkərli diabetdən əziyyət çəkən 14 yaşlı Leonard Tompsona ilk dəfə insulin tətbiq edildi. Bu, tibb aləmində inqilabi bir hadisə idi.

-1950-ci il: İsrail parlamenti (Knesset) Qüdsü (Yerusəlim) ölkənin paytaxtı elan etdi.

-1960-cı il: Jaka Pikar və Don Uolş "Triest" batiskafı ilə yer kürəsinin ən dərin nöqtəsinə — Marian çökəkliyinə (10,911 metr) endilər.

-1989-cı il: Məşhur sürrealist rəssam Salvador Dali 85 yaşında vəfat etdi.

-1997-ci il: Madlen Olbrayt ABŞ-ın ilk qadın Dövlət Katibi oldu.