Eskimonu da özüm hazırlamışam” – bu reseptlə hazırlayacağınız dondurmanı fəxrlə ailə üzvlərinizə, qonaqlara təqdim edin və onların bəh-bəh kəlməsini eşidin.
Ərzaqlar:
Süd (3,2 %) – 300 ml.
Quru süd – 35 qr.
Qaymaq (35 %) – 250 qr.
Şəkər tozu – 90 qr.
Qarğıdalı nişastası – 10 qr.
Vanilin – 1 paket
Qlazur üçün:
Şokolad – 200 qr.
Kərə yağı – 200 qr.
Hazırlanması:
Bir qazançaya şəkər tozu, vanilin, quru süd və 250 ml. süd tökülür, qarışdırılır. Ayrı bir stəkanda isə 50 ml. südlə nişastanı qarışdırın. Qazançadakı südlü qarışığı odun üzərinə qoyun, qaynayan kimi stəkandakı südlü nişastanı tökün və qatılaşana kimi qarışdırın. Alınan kütləni süzgəcdən keçirin və ağzını bağlayıb, soyuducuya qoyun.
Qaymağı soyuducudan çıxarıb yumşalana kimi mikserdə çalın. Sonra südlü qarışıqla qarışdırın. Alınan kütləni dərhal dondurma formalarına doldurun, taxta çubuqlar batırın və buzlamaya qoyun.
Eskimo, əlbəttə ki, qlazursuz olmaz, dondurmalar buzlamada ikən qlazuru hazırlayaq. 200 qr. şokoladla 200 qr. kərə yağını əridib, qlazur hazır edirik. Formalardakı dondurmanı səliqə ilə çıxarıb, isti qlazurun içinə batırırıq və tez də çıxarıb, kağız salınmış boşqaba düzüb yenidən buzlamaya qoyuruq.
