Nəriman Zeynalzadə
Deyirəm döz ürəyimə,Kar etmir söz ürəyimə,
Tökübdür köz ürəyimə,
Gözünün yaşına gəldim.
Gümanın yığıb gedibdir,
Ümidin qırıb gedibdir,
Gözünü sıxıb gedibdir,
Gözünün yaşına gəldim.
Sızlayır eşqin yarası,
Yaş tökür gözün qorası,
Gedibdir gözün qarası,
Gözünün yaşına gəldim.
Sevginin sınıb qanadı,
Bağrımın başı qanadı,
Dedilər o qız anadı,
Gözünün yaşına gəldim.
01.01.2024
