Pakistan Hərbi Hava Qüvvələri Talibana Pəncşiri ələ keçirməkdə kömək ediblər.
Bu barədə Hindistanın "Daily Pioneer” nəşri məlumat yayıb.
Nəşrin məlumatına görə, Pakistan Pəncşir vadisinin bombardman edilməsi üçün Talibana 3 pilot və 4 JF-7 qırıcısı göndərib. Pakistan aviasiyası Pəncşirə 20 dəfə döyüş uçuşu həyata keçirib. Bundan başqa əməliyyata xüsusi təyinatlı qüvvələrdən ibarət qrup və Pakistan ordusunun 11-ci korpusu da qoşulub.
Pakistanın "Doun” nəşri isə Hindistanın mətbuatnın yaydıqlarını feyk adlandırıb. Pakistan təyyarəsinin vurulduğunu göstərən fotonun əslində ABŞ-da 2018-ci ildə təyyarə qəzasına məxsus olduğu bildirilib. Pakistan nəşri qeyd edib ki, PUA-ların Pəncşirə hücumunun səs yazısı isə "Arma” kompüter oyununa və F-15 təyyarəsinin Uelsdəki uçuşuna aiddir.
Qeyd edək ki, bir müddət öncə Əfqanıstan Milli Müqavimət Cəbhəsi Fəhim Dəştinin ölümündə Pakistanı günahlandırmışdı. Cəbhənin iddiasına görə, Dəşti Pakistan aviasiyasının bombardmanı nəticəsində həlak olmuşdu.