İranın Hərbi Dəniz Qüvvələri ölkənin şimalında, Xəzər dənizində hərbi təlimlərə başlayır. Sərhədimizdə keçiriləcək təlimlərlə əlaqədar olaraq Astara şəhərinin bəzi yerlərində partlayış səslərinin eşidiləcəyi bildirilib.
GunAz.az xəbər verir ki,İranın sözügedən ərazidə təlim keçməsi nəyə hesablanıb?
Mövzu ilə bağlı danışan hərbi ekspert Ədalət Verdiyev deyib ki, İsraillə gərginlik fonunda İranın təlimlərə başlaması diqqət çəkir:
“İran son zamanlar Xəzər dənizində kifayət qədər intensiv təlimlər keçir. Xəzər dənizini “dostluq və təhlükəsizlik dənizi” adlandıran İran digər ərazilərin su akvatoriyalarında təlim keçməyə risk etmir. Üstünlüyü daha çox Xəzər dənizinə verir. Son illərdə rəsmi Tehran Xəzər donanmasını gücləndirir. Halbuki İran üçün ehtimal olunan təhdid istiqaməti qətiyyən Xəzər dənizi ilə bağlı deyil”.
Hərbi ekspertin sözlərinə görə, belə təlimlər keçirilən zaman qonşu ölkələri həmin təlimlərin məqsədi, hədəfləri və miqyası barədə məlumatlandırmaq lazımdır:
“Belə məlumatlandırmalar əvvəlcədən həyata keçirilib. Əks halda Azərbaycan mütləq bu barədə etiraz notasını İrana təqdim edərdi. Yaxşı olardı ki, Tehran bu təlimləri sərhədimiz yaxınlığında deyil, ona təhdid törədəcək qüvvələrə yaxın ərazidə keçirsin”./Globalinfo.az
