Bu gün ölkə ərazisində hava şəraitinin kəskin dəyişməsi nəticəsində bəzi ərazilərdə güclü külək və yağıntı qeydə alınıb.
Ekologiya və Təbii Sərvətlər Nazirliyinin Milli Hidrometeorologiya Departamentindən GunAz.az -a verilən məlumata görə, saat 13:00-a qədər Culfa rayonunda və Ordubadın Nülgüt kəndində güclü yağış müşahidə olunub.
Düşən yağıntının miqdarı Culfada 30 (aylıq normanın 157 faizi), Ordubadın Nülgüt kəndində isə 28 mm (aylıq normaya yaxın) təşkil edib.
Eyni zamanda Gəncədə küləyin ani maksimal sürəti 24 m/san, Şəmkirdə 21 m/san olub.
