Bu günlərdə Azərbaycan
Kikboqsinq Federasiyasının təşkilatçılığı ilə Kadetlər və Yeniyetmələr üzrə Azərbaycan
çempionatının açılış mərasimi olmuşdur. Əvvəlcə Azərbaycanın Dövlət Himni səsləndirildi
və şəhidlərimizin xatirəsi birdəqiqəlik sükutla yad edildi.
Tanınmış idmançıların, idman həvəskarlarının,
respublikamızın ayrı-ayrı bölgələrindən gəlmiş 1000 nəfərə yaxın kikboqsinqçilərin
iştirakı ilə keçirilmiş Respublika çempionatını Azərbaycan Kikboqsinq
Federasiyasının Prezidenti, millət vəkili Adil Əliyev açaraq tədbir
iştirakçılarını salamladı və Kikboqsinq Federasiyasının üzvü olmuş, aprel
döyüşlərində torpağımızı erməni quldurlarından qoruyarkən şəhid olmuş Çingiz
Qurbanovun, eləcə də Vətən uğrunda şəhid olmuş cəmi soydaşlarımızın xatirəsi
bir dəqiqəlik sükutla yad edildi.
Adil Əliyev ölkə prezidenti,
Ali Baş Komandanımız cənab İlham Əliyevin idmançılara göstərdiyi diqqət və
qayğıdan danışdı və çempionatı açıq elan etdi.
Sonra kikboqsinqçilər yarışa
qatıldılar və qızğın döyüşlər başladı. Təcrübəli məşqçilər və hakimlər
briqadası yarışı diqqətlə izləyir və qalibləri elan edirdilər.
Həmişə olduğu kimi,
"Uniklinika”nın həkim və tibb işçiləri yarışda zədə almış kikboqsinqçilərə ilk
tibb yardım edirdilər. Üç gün davam edən Respublika çempionatında qaliblərə
diplomlar təqdim edildi.
Klublar üzrə qələbə qazanan
"Qızıl Əlcək” idman klubu (yeniyetmələr üzrə) Kuboka sahib oldular. Baş məşqçi,
Dünya çempionu Rəhim Allahverdiyev AKF-nın prezidenti Adil Əliyevə təşəkkürünü
bildirdi.
Kadetlərarası Azərbaycan
çempionatında komandalar üzrə II yerə "Dinamo” idman klubu (baş məşqçi Hakim
Hacıyev) layiq görüldü.
Ramil Səfərov adına Cənub idman
klubu, İbad Hüseynli adına kikboqsinq klubu və digər klublar yarışda fərqləndilər.
"İdman sağlamlıq deməkdir.
Yeniyetmə yaşlarından idmanla məşğul olan idmançılar zərərli vərdişlərdən əl çəkir
və cəmiyyətə yararlı bir vətəndaş kimi böyüyürlər. Bu günün sağlam idmançıları
sabahın əsgərləridirlər.
Sağlam və güclü ordu üçün
sağlam və güclü idmançılar lazımdır. Ordumuz günü-gündən güclənir. Güclü
ordumuzun sayəsində tezliklə düşmən tapdağında inləyən torpaqlarımızı təcavüzkar
erməni quldurlarından azad edəcəyik. Azərbaycan idman ölkələri kimi tanınır və
dünya səviyyəli yarışlara ev sahibliyi edir” - deyən Adil Əliyev tədbir
iştirakçılarına və idmançılara təşəkkürünü bildirdi.
Müxtəlif bölgələrdən gəlmiş
kadetlər və yeniyetmələrdən ibarət kikboqsinqçilərimiz ayrı-ayrı çəki dərəcələrində
I, II və III yerləri bölüşdürərək Azərbaycan çempionatında fərqləndilər və
İdman və Turizm Nazirliyinin diplomlarına layiq görüldülər.
AKF-nin Prezidenti Adil Əliyev
və idarə heyətinin üzvləri, eləcə də 2016-cı ildə torpaqlarımızın azadlığı
uğrunda əlil olmuş kəşfiyyat qrupunun rəhbəri, baş leytenant, igid Qəhrəman
Kamil Musavi də qalibləri təbrik etdilər.
Rauf İlyasoğlu