Bu gün İranda 13-cü prezident seçkiləri keçirilir.
CunAz.az bildirir ki, Seçki məntəqələri yerli vaxtla saat 07:00-da (Bakı vaxtı ilə saat 06:30-da) açılıb və saat 00:00-a (Bakı vaxtı ilə saat 23:30) qədər işləyəcək. Bu halda onların işi ehtiyac olduğu halda saat 02:00-a (01:30) qədər uzadıla bilər. İranın daxili işlər naziri Əbdülrza Rahmani Fəzlinin bəyanatına görə, seçkilərin ilkin nəticələri səsvermənin tamamlanmasından iki gündən gec olmayaraq elan ediləcək. Dövlət başçısı vəzifəsi uğrunda dörd siyasətçi mübarizə aparır.
Xaricdəki İran vətəndaşları dünyanın 133 ölkəsində səs verə biləcəklər. Ölkədən xaricdə 234 seçki məntəqəsi açılacaq.
Birinci turda qələbə üçün namizədlərdən biri 50%-dən çox seçici səsi yığmalıdır. Əks təqdirdə ikinci turu təşkil etmək lazım gələcək. Belə olan halda ikinci tur 25 iyunda keçirilə bilər.
Prezident seçkilərinin favoriti İbrahim Raisi hesab edilir. Altmış yaşlı siyasətçi 2019-cu ildən İran məhkəmə orqanlarının başçısı postunu tutur, o, əvvəllər baş prokuror olub. Raisi seçkiqabağı kampaniyasının gedişatında yoxsulluğa və korrupsiyaya qarşı mübarizə aparmağa söz verib. 2017-ci ildə Raisi prezident olmağa təşəbbüs edib, ancaq Həsən Ruhaniyə uduzub.
Ondan başqa, prezident postu uğrunda Möhsen Rezai də mübarizə aparır. O, 1980-90-cı illərdə İran İslam İnqilabı Keşikçiləri Korpusuna başçılıq edib. İranın prezident vəzifəsinə həmçinin Mərkəzi Bankın sədri Abdulnaser Hemmati və parlament sədrinin müavini Əmir Hüseyn Kazizade Haşimi də namizəddir.
İran prezidenti dörd il müddətinə seçilir.
İslam Respublikasının hazırkı prezidenti Həsən Ruhani seçkilərdə namizəd kimi iştirak hüququna malik deyil. Çünki o bu vəzifəni ardıcıl iki dəfədir icra edir.
Şeyla NƏSİROVA
