ABŞ prezidenti Donald Tramp rəsmi Vaşinqtonun Ümumdünya Səhiyyə Təşkilatının maliyyələşdirilməsini dayandırdığını söyləyib. O, bunu aprelin 15-də keçirdiyi brifinqdə bəyan edib. "Bu gün rəhbərliyə, təşkilatın pis idarəetməsi və koronavirusun yayılması ilə bağlı məlumatların gizlədilməsindəki rolunu qiymətləndirənə qədər ÜST-ə töhfələri dayandırmağı tapşırdım” deyib. O xatırladıb ki, ABŞ vergi ödəyiciləri il ərzində təşkilatın büdcəsinə 400-500 milyon dollar, Çin isə 40 milyon dollar ödəyib. Trampa görə, ÜST-nin ən təhlükəli qərarlarından biri ABŞ-ın Çin və digər ölkələrlə hava səyahətinə qadağan edilməsini tənqid etməsi idi. "Xoşbəxtlikdən, mən onların (ÜST) tövsiyələrini dinləmədim və uçuşları təxirə saldım, bununla da minlərlə insanın həyatını xilas etdik. <…> ÜST tövsiyələrinə əməl edən və sərhədləri açıq qoyan digər ölkələrə, xüsusən Avropaya baxın.” ABŞ prezidenti təşkilatı yanlış reytinqlər və tövsiyələr səbəbindən 20 qat daha çox insanı yoluxdurmaqda günahlandırıb: "ÜST mütəxəssisləri Çin səlahiyyətlilərinin məlumatlarına etibar edib və virusun guya insandan insana ötürülmədiyini əminliklə bildirib”. Tramp əlavə edib ki, Vaşinqton digər ölkələrlə ÜST-ün islahatını və bu təşkilata verilən vəsaitlərin istifadəsini müzakirə edəcək.