Pan-Afrika Parlamentinin (PAP) Prezidenti Rocer Nkodo Danqın dəvəti əsasında Azərbaycan Respublikasının Afrika İttifaqı yanındakı Daimi nümayəndəsi, səfir Elman Abdullayev Pan-Afrika Parlamentin üçüncü sessiyasında iştirak etmək məqsədilə Cənubi Afrika Respublikasının Midrand şəhərinə səfər etmişdir.
GunAz.az bildirir ki, səfər çərçivəsində səfir Elman Abdullayev PAP-ın prezidenti, eləcə də bir sıra afrikalı millət vəkilləri ilə görüşlər keçirmişdir. Eyni zamanda, səfir E.Abdullayev PAP-ın üçüncü sessiyası çərçivəsində afrikalı parlamentarilər qarşısında çıxış etmişdir.
Çıxış zamanı səfir E.Abdullayev səfərə görə PAP-ın prezidentinə təşəkkürünü bildirmiş, Azərbaycan-Afrika münasibətləri barədə PAP üzvlərinə və tədbirdə iştirak edən afrikalı parlamentarilərə ətraflı məlumat vermişdir. Bununla yanaşı, Azərbaycanın 2019-2022-ci illərdə Qoşulmama Hərəkatına (QH) sədrlik edəcəyini qeyd edən səfir E.Abdullayev ölkəmizin qarşıdan gələn sədrliyinin prioritetləri və 2019-cu ilin 25-26 oktyabr tarixlərində Bakı şəhərində keçiriləcək QH-nin XVIII Zirvə Görüşü ilə bağlı məlumat vermişdir. Habelə, səfir E.Abdullayev Afrikanın QH-nin yaradılmasında, eləcə də QH-nin Afrika ölkələrinin müstəqilliyinin möhkəmləndirilməsində xüsusi rol oynadığını bildirərək, sədrliyimiz çərçivəsində Afrika ilə münasibətlərimizin daima sıx şəkildə aparılacağını bildirmişdir.
N.SAFURA
