Ebola epidemiyası ilə mübarizədə səylərin artırılmasına baxmayaraq, çətinliklər hələ də qalır.
GunAz.az xarici mətbuata istinadla xəbər verir ki, bunu Ümumdünya Səhiyyə Təşkilatının (ÜST) Səhiyyə üzrə Təcili Xəbərdarlıqlar və Cavab Əməliyyatları üzrə direktoru Abdirahman Mahamud deyib.
A.Mahamud Ebola epidemiyasının yayıldığı Konqo Demokratik Respublikası və Uqandadakı vəziyyəti qiymətləndirib.
Konqoda Bundibugyo virusunun yaratdığı Ebola epidemiyasının üç həftədən çoxdur davam etdiyini xatırladan Mahamud bildirib ki, 8 iyun tarixinə olan məlumata görə, Konqo Demokratik Respublikasında 550 təsdiqlənmiş yoluxma halı, 101 ölüm və ümumilikdə 19 sağalma halı qeydə alınıb. Epidemiya təsdiqlənmiş yoluxma hallarının 94 faizini (487) təşkil edən İturi əyalətində cəmləşib. Onun sözlərinə görə, təsdiqlənmiş yoluxma hallarının bu artımı test və təmas izləmə fəaliyyətlərinin artması ilə əlaqədardır ki, bu da yaxşı xəbərdir:
"Bununla belə, biz yoluxma hallarının qarşısını almaqda geridə qalmışıq və bir çox çətinliklər hələ də mövcuddur. Həmçinin təxminən 100 şübhəli yoluxma halını təsdiqləmək və ya istisna etmək üçün davam edən araşdırmalarımız var".
Mahamud onu da deyib ki, Uqandada 19 təsdiqlənmiş yoluxma halı, 2 ölüm və bir ehtimal olunan ölüm halı qeydə alınıb.
Mahamud bildirib ki, ÜST Konqoda yerli hakimiyyət orqanlarını və səhiyyə tərəfdaşlarını dəstəkləməyə davam edir.
Konqonun şərqindəki İturi əyalətində 246 şübhəli yoluxma və 65 ölüm hadisəsinin elan edilməsindən sonra 15 mayda ölkədə epidemiya elan edilib.
ÜST mayın 17-də yenidən ortaya çıxan Ebola epidemiyası səbəbindən beynəlxalq ictimai səhiyyə fövqəladə vəziyyəti elan edib.
Səhiyyə orqanlarının məlumatına görə, hazırkı epidemiyaya Ebolanın nadir bir variantı olan "Bundibugyo" virusu səbəb olur və təsdiqlənmiş müalicə və ya peyvənd yoxdur.
Epidemiyada yoluxanların sayının 1000-i keçdiyi bildirilir.
