«Azad Azərbaycan» qəzetinin redaksiyasında
Azərbaycan Prezidentinin sərəncamı ilə inşa edilən binadan mənzil almaq üçün qəzetin
əməkdaşları arasından namizədlərinin seçilməsi ilə bağlı iclas keçirilib. İclasda
Azərbaycan Prezidenti Yanında Kütləvi İnformasiya Vasitələrinə Dövlət Dəstəyi Fondunun
Müşahidə Şurasının üzvü, Mətbuat Şurasının sədr müavini Müşviq Ələsgərli «Azad Azərbaycan»
qəzetinin baş redaktoru Asəf Abbasov və redaksiya heyəti iştirak edib.
İclasda çıxış edən Asəf Abbasov qaydalara
uyğun olaraq iclasın sədri və katibinin seçilməsi təklifi edilib. 15 əməkdaşdan
13-nün iştirak etdiyi və bununla da yetərsayın olduğu iclasın sədrliyinə Asəf Abbasovun,
katibliyinə isə Təhminə Məmmədovanın namizədliyi irəli sürülüb və qəbul edilib.
İclasın sədri, «Azad Azərbaycan» qəzetinin
baş redaktoru Asəf Abbasov xatırladıb ki, iclas jurnalistlər üçün tikilən ikinci
binada mənzillərin verilməsi ilə bağlı keçirilir və redaksiya heyəti tərəfindən
namizədlikləri irəli sürülən jurnalistlər barədə fikir mübadiləsi aparılacaq.
«Azad Azərbaycan» qəzetinin şöbə müdirləri
Ağalar İdrisoğlu, Məmmədhəsən Məmmədov və digərləri çıxış edərək bildiriblər ki,
qəzetin əməkdaşları dövlətçiliyimizin, milli mətbuatımızın inkişafının keşiyində
ayıq-sayıq dayanıblar. Çıxış edənlər verəcəkləri namizədlərin ən layiqlilər sırasında
olacaqlarını qəti şəkildə qeyd ediblər. Bildirilib ki, aparılan müzakirələr tam
şəffaf, verilən qərarlar isə ədalətli olacaq.
Bundan sonra«Azad Azərbaycan» qəzetinin
6 əməkdaşının adı namizədlər siyahısına salınıb və səsə qoyulub. Tədbir iştirakçıları
namizədlərə yekdilliklə səs veriblər. Qərar protokollaşdırılıb və sənədlərin hazırlanması
prosesinə start verilib.
Mətbuat Şurasının sədr müavini Müşviq Ələsgərli
çıxış edərək bildirib ki, iclas şəffaf və verilən qərarlar ədalətlidir.
İclasda çıxış edən jurnalistlər də öz növbələrində
ölkə prezidenti İlham Əliyevin media işçilərinə göstərdiyi diqqət və qayğısına görə
minnətdarlıqlarını bildirərək, öz peşələrinə hər zaman sadiq qalacaqlarını vurğulayıblar.
GUNAZ.az