“Qarabağ” bu gün Avropa Liqasının qrup mərhələsinin son görüşündə “Arsenal”ın qonağı olacaq.
GunAz.az xəbər verir ki, görüş “Arsenal” üçün formal xarakter daşıyır.
Çünki London təmsilçisi iki tur əvvəldən “pley-off”u özü üçün təmin edib. Üstəlik, komanda nəticədən asılı olmayaraq, qrup liderliyini də təmin etdiyindən, bu görüşə daha çox gənclərlə və əsas matçlarda oynamaq imkanı əldə etməyən futbolçularla çıxacaq. Məsələn, fransalı mərkəz müdafiəçisi Loran Kosyelninin uzun zədədən sonra mövsümdəki ilk oyununu məhz “Qarabağ”a qarşı keçirəcəyi gözlənilir.
“Arsenal”ın baş məşqçisini daha çox İngiltərə Premyer Liqasının XVII turu çərçivəsində keçiriləcək “Sauthempton”la səfər matçı düşündürür. Bununla belə, baş məşqçi Unai Emeri bu matçda Emil Smit-Rouv, Eynsli Meytlənd-Naylz, Edi Nketia, Co Uilokkimi oyunçulara üstünlük versə də, öz meydanında uduzmamağa çalışacaq. “Arsenal” artıq 21 oyundur ki, uduzmur və bu seriyanın uzanması “topçular” üçün əla motivasiya olacaq.
“Qarabağ”da isə bu matç üçün yeganə motivasiya qrupda III yeri tutmaq istəyidir. Ukraynanın “Vorskla” komandası Portuqaliya səfərində uduzsa, təmsilçimiz isə London səfərindən minimum bir xalla qayıtsa, o zaman III yer “Qarabağ”ın olacaq.
Qurban Qurbanovun hücum xəttində zədəli İnosent Emeqaranın yerində Araz Abdullayevi sınayacağı gözlənilir.
Xatırladaq ki, “Emireyts” stadionunda keçiriləcək qarşılaşma Bakı vaxtı ilə saat 00:00-da başlayacaq.
