"Müxtəlif tədqiqatlara görə, koronavirus infeksiyasına yoluxmuş pasiyentlərin əksəriyyətində sonrakı 1 ay ərzində iybilmə və dadbilmə qabiliyyətinin tam və ya hissəvi bərpası baş verir. Bu halların tez bərpa olduğu şəxslərdə çox güman ki, virus yalnız burnun selikli qişa hüceyrələrini zədələyib”.
Bunu "Qafqazinfo”ya açıqlamasında Səhiyyə Nazirliyinin baş infeksionisti Təyyar Eyvazov bildirib.
O qeyd edib ki, əgər zədələnmə daha dərindirsə, iybilmə və dadbilmədə iştirak edən sinir aparatı zədələnibsə, bu hüceyrələr daha gec bərpa olunur:
"Bundan başqa xəstəliyi keçirmişlərdə depressiv vəziyyətlər, başda "duman” hissi, diqqətin cəmləşdirilməsində çətinlik, yaddaşın zəifləməsi, subfebril hərarət, baş ağrıları, bütün bədəndə ağrılar, yuxunun pozulması, ürəkdöyünmə, təngnəfəslik, döş qəfəsində ağrı və s. kimi əlamətlər də uzun müddət davam edə bilər. Xəstəliyi daha ağır formada keçirən şəxslərdə ağciyərlərin funksiyası ciddi pozula bilər və belə pasiyentlərin orqanizmi bərpa üçün uzunmüddətli müalicə tələb edir”.
Baş infeksionist əlavə edib ki, bərpa prosesi həmçinin pasiyentin yaşından və yanaşı xəstəliklərinin olmasından çox asılıdır.