Bu gün Azərbaycanın daha üç taekvondoçusu Bolqarıstanın paytaxtı Sofiyada keçirilən Avropa çempionatında mübarizəyə başlayacaq.
GünAz.az xəbər verir ki, üçüncü yarış günündə 74 kq çəki dərəcəsində çıxış edən Ayxan Tağızadə 1/16 finalda Atman Butuyakla (Fransa) qarşılaşacaq.
80 kq-da yarışan ikiqat dünya və Avropa çempionu Milad Beiqi də bu gün mübarizəyə qoşulacaq. Olimpiadaya vəsiqəni təmin etmiş yeganə idmançımız olan, ötən ay Türkiyədəki turnirdə qızıl medal qazanmış Milad Beiqi 1/8 finalda David Şimek (Çexiya) – Aleksandr Filippov (İsrail) cütünün qalibi ilə qarşılaşacaq.
Qadınların yarışında Fəridə Əzizova (-67 kq) 1/8 finalda Nataliya Yuleva (Belarus) – Elin Yuhanson (İsveç) duelinin güclüsü ilə üz-üzə gələcək.
Qeyd edək ki, ilk yarış günündə Minayə Əkbərova (-46 kq) bürünc medal qazanıb. Avropa çempionatına sabah yekun vurulacaq.