Bu gün Azərbaycan Premyer Liqasında XXVI turun daha iki oyunu keçiriləcək.
Gunaz.az-ın məlumatına görə, oyunlardan biri paytaxtda, digəri isə Qəbələdə baş tutacaq.
Günün ilk oyununda "Səbail” doğma meydanda "Zirə” ilə üz-üzə gələcək. Bu komandalar yalnız cari mövsüm qarşılaşıblar. İki görüşdə "Zirə” qələbə qazanıbsa, bir qarşılaşma heç-heçə başa çatıb. Top fərqində qonaqların üstünlüyü var – 4:2. "Zirə” rəqibinə qarşı keçirdiyi hər 3 matçda qol vurub.
Günün digər matçında "Qəbələ” "Keşlə”ni qəbul edəcək. Bu qarşılaşma komandalar arasında yubiley oyunu olacaq. Onlar indiyədək 39 dəfə üz-üzə gəliblər. 11 oyunda "Qəbələ” meydanı 3 xalla tərk edibsə, 14 matçda paytaxt təmsilçisi qələbəyə sevinib. 14 görüşdə isə qalib müəyyənləşməyib. Top fərqində də "Keşlə” klubu öndədir - 50-39. Paytaxt klubu həmçinin 10 oyundur rəqibini məğlub edə bilmir. "Qəbələ” bu komandaya qarşı 6 oyundur meydanı qolsuz tərk etmir.
Premyer Liqa, XXVI tur
5 may (şənbə)
"Qəbələ” – "Keşlə”
Hakimlər: Rəvan Həmzəzadə, Elşən Acalov, Məmmədəli Kərimov, Ömər Paşayev
AFFA nümayəndəsi: Əsgər Əmirəliyev
Hakim-inspektor: Şahin Cəfərov
Qəbələ şəhər stadionu, 19:00
"Səbail” – "Zirə”
Hakimlər: İnqilab Məmmədov, Mübariz Haşımov, Rahil Ramazanov, Orxan Məmmədov
AFFA nümayəndəsi: Maşallah Əhmədov
Hakim-inspektor: Fazil Mürşüdov
"Bayıl Arena”, 17:00
Tura sabah keçiriləcək "Qarabağ" - "Neftçi" matçı ilə yekun vurulacaq.(Report)