Misirin müxtəlif şəhərlərində qum fırtınası hökm sürür.
GunAz.az “Anadolu” agentliyinə istinadən xəbər verir ki, fırtına səbəbindən Kefr Şeyx şəhərində avtobusun aşması nəticəsində 4 nəfər ölüb, Süveyş şəhərində isə 27 nəfər xəsarət alıb.
Port Səid şəhərində isə güclü külək bir binanın bəzi hissələrini uçurub. Nəticədə 1 nəfər ölüb, 2 nəfər yaralanıb.
Beləliklə, fırtınanın səbəb olduğu hadisələrdə ümumilikdə 5 nəfər ölüb, 29 nəfər yaralanıb.
İsmailiyyə şəhərində isə küləyin elektrik naqillərini qoparmasına görə 5 evdə yanğın olub. Lakin, ölən və ya yaralananlar barədə məlumat verilməyib.
Bunlardan başqa, Süveyş, Zeytiyat, Rəşid və Burullus limanlarının fəaliyyəti dayandırılıb.
Qatı qum görmə məsafəsini azaldığı üçün Qahirə və Əs-Səid şəhərlərində qəzaların qarşısını almaq məqsədilə magistral yollar bağlanıb.
