Qazaxıstanın birinci prezidenti Nursultan Nazarbayev qarşıdan gələn prezident seçkiləri üçün “Nur Otan” partiyasından, hazırda ölkə başçısı vəzifələrini icra edən Kasım-Jomart Tokayevin namizədliyini irəli sürüb.
Tengrinews.kz saytının məlumatına görə, bu barədə Nazarbayev partiyanın növbədənkənar qurultayında bəyanatla çıxış edib.
“Nur Otan” partiyasının sədri olaraq, qurultayda Kasım-Jomart Tokayevin Qazaxıstan Respublikası prezidenti postuna namizədliyinə baxılmasını təklif edirəm. Onunla uzun illər birgə işləmişik, onun bu gün bu vəzifəni tutmağa ən layiqli namizəd olduğunu hesab edirəm.
Tokayev müstəqilliyin ilk günlərindən bəri mənimlə müxtəlif sahələrdə çalışıb. Mənimlə çiyin-çiyinə Qazaxıstanın xarici siyasətinin quruculuğunda iştirak etmiş şəxslərdəndir. Uzun illər Xarici İşlər Nazirliyinə rəhbərlik edib”, - deyə Nazarbayev vurğulayıb.
