Rusiyanın Tomsk şəhərində yaşayış evinin yaxınlığında avtomobil dayanacağında partlayıcı qurğu aşkar edilib. Bu barədə informasiyanı hüquq-mühafizə orqanlarındakı mənbəyə istinadən TASS agentliyi yayıb. Verilən məlumatda bildirilir ki, partlayıcı qurğu 17 mərtəbəli binanın yaxınlığında tapılıb. "Saat 10:00-da növbətçi hissəyə yaşayış evinin yaxılığında avtomobil dayanacağında şübhəli əşya aşkarlanması barədə məlumat daxil olub. Hadisə yerinə gələn ekspertlər müəyyənləşdiriblər ki, o, təhlükə kəsb edir", - mənbə deyib. Hüquq-mühafizə orqanları binanın sakinlərini təxliyə ediblər. Partlayıcı qurğu zərərsizləşdirilib. Faktla bağlı araşdırma aparılır.
