Xətai
rayonunun Xudu Məmmədov küçəsi ilə hərəkət edərkən qarşımıza bir hasar çıxdı.
2011-ci
ilin avqust ayından bu ərazinin bir hissəsi dörd bir tərəfdən hasara alınıb. Küçənin
sağ və sol tərəflərindəki hündür binalara gediş-gəliş çətinləşib. Gecələr darısqal
yoldan keçmək həm təhlükəli, həm də qorxuludur. Zülmət qaranlıqdan istifadə
edən bəzi yaramaz insanlar obyektlərə, dükanlara basqın edir, oğurluq və
zorakılıq hallarına yol verilir.
Deyilənə görə
burada metro tikilir. Çox acınacaqlı haldır ki, 2011-ci ildən bu yol bağlansa
da, iş demək olar ki, getmir, insanlar əziyyət çəkirlər. Vətəndaşların haqlı
narazılıqlarını və şikayətlərini nəzərə alaraq GUNAZ.az saytının əməkdaşları
ilə həmin ərazidə olduq.
Acınacaqlı
bir mənzərə ilə qarşılaşdıq. Sakinlərdən Fazil Musayev dedi:
"Gördüyünüz
bu beşmərtəbəli binanın birinci mərtəbələrində 30-dan çox obyekt var. Çoxusu da
özəlləşdirilmişdir. Yollar bağlı olduğu üçün dükanların çoxusu bağlıdır. Hər
dükanda 3-4 nəfər işçi evinə çörək pulu aparırdı. Həm də neçə ailə işlə təmin
olunmuşdu. Qaranlıq, darısqal yerdə alver etmək müşkül məsələdir. Odur ki,
sahibkarların çoxusu obyektlərini bağlayıblar".
Sahibkar Məlikova
Lalə Hüseyxan qızı biləndə ki, şikayətlə bağlı gəlmişik dərdi açıldı nə açıldı:
- Gördüyünüz
bu dükanda kişi geyimləri, pal-paltar satırdım. Kimsəsiz uşaqlar, oğrular
dükanımı iki dəfə yarıblar. Polisə məlumat versək də hələ də bir nəticə yoxdur.
Odur ki, dükanı bağlamışam.
Bu ərazidə oğurluq
baş alıb gedir. Xudu Məmmədov küçəsi 39 nömrəli binanın sakinləri bu
vəziyyətdən cana doyublar, bir neçə binada çat əmələ gəldiyini nəzərə çatdırdılar. "Xəzər” kafesinin sahibi
Sənan Mikayılov əsəbi halda dilləndi: "Bu kafedən bir neçə ailə dolanır. Gecələr
o qədər qaranlıq olur ki, göz-gözü görmür. Oğrular bu yiyəsizlikdən istifadə
edərək qapını sındırmış və kafedəki kassa aparatını, eləcə də Post Terminalı
oğurlayıblar. Hər tərəfə məlumat versəm də heç kəsdən kömək yoxdur. Əgər
sahibkarın işinə əngəl törədib şərait yaradılmırsa, onda dövlət konpensasiya verməlidir.
Metropolitenin
mətbuat xidməti ilə əlaqə saxlamaq istəsək də operator qız bildirdi ki, Nəsimi
müəllim yerində yoxdur. Əlaqə telefonun bilmirəm.
Sakinlər indi
Xudu Məmmədov küçəsinin hasardan azad olunmasını səbirsizliklə gözləyirlər.
Rauf İLYASOĞLU
GUNAZ.az