Çalışaq yalançı olmayaq...

Atalardan gözəl məsəl var: "Yaxın qonşu uzaq qohumdan irəlidir”. Digər bir məsəldə isə deyilir: "Uman yerdən küsərlər”.
Tanınmış xanəndə Zakir Əliyevi yaxşı oxusada  yaşadığı (bağ evi) Qubanın Alpan kəndində ona inam çox azalıb , buna səbəb həmin kənddə onun xeyir-şərdə iştirak etməməsidir. Bu günlərdə jurnalist dostum Bilman Allahverdiyev  müğənni Zakir Əliyev haqda mənə haqlı giley-güzarını danışmışdı, məndə buna biganə qalmaya bilməzdim. Jurnalist dostumun dediklərindən:  "zəng edərək onu Qubanın Alpan kəndində yaşayan mənim cəbhədaşım, dostum  və Zakir Əliyevin yaxın qonşusu olan, birinci qrup Qarabağ müharibəsi əlili Sahib İsgəndərovun toy məclisində xanəndə kimi iştirak etməyə dəvət etdim. Lakin Zakir Əliyev söz versə də, nədənsə bu toyda iştirak etmədi. Məclis əhli səbirsizliklə Zakir Əliyevin gəlişini çox gözlədilər, müğənnidən bir xəbər çıxmadı. Kənd əhli fikirləşdi ki, yəqin müğənni ya pula görə gəlməyib, ya da gecə ilə gündüzü dəyişik salıb." Özgənin babalın yumaq istəmirik. Bizə də çox qəribə gəldi ki, vətənin azadlığı uğurunda erməni quldurlarına qarşı döyüşərək iki ayağını itirən , yarımcan olmuş  Qarabağ müharibəsi əlilinin toyuna çağırılmış müğənni nə səbəbə gəlməyib?
Zakir Əliyev gərək söz verməyəydi. Ya da deyəydi ki, ayrı yerdə toyum var. Onda heç kəs də intizarla gözləməzdi, nə də inciməzdi. Onu da qeyd edək ki, Qarabağda döyüşərək istər şəhid olanlar, istərsə də yaralanaraq çətin durumda yaşayan soydaşlarımız Vətənimizin ən qeyrətli, şərəfli oğullarıdır. Onların toyunda hər bir müğənni təmənnasz iştirak etməlidir.
İndiki dövrdə pula daha çox dəyər verilir. Bəs mərdlik harda qaldı? Əlillərə belə hörmət edilirmi? Gələcəkdə heç bir müğənni belə məsuliyyətsizliyə yol verməməlidir. Çalışaq Qarabağ müharibəsi əlillərini sevindirək. Çünki Rəbbimizin xoşuna gələn işlərdən biri də insanları sevindirməkdir.
Rauf İLYASOĞLU

GUNAZ.az