Yenə gəldim qarşına,
Vuruldum dönə -dönə.
Döndüm sənin başına,
Sarıldım dönə -dönə.
Ay istəklim , əzizim ,
Mənim gözəl Təbrizim.
Qulağımda çığnayır ,
Səttarxanın harayı.
Bizi-bizə bağlayır,
Şah İsmayıl sarayı .
Hər küçəndə var izim ,
Mənim gözəl Təbrizim.
Cənnətdən nişanədi ,
Meyvələri , bağların.
İgidi əfsanədi ,
Bir səngərdi dağların.
Düzənləri dənizim ,
Mənim gözəl Təbrizim.
Ürəyimdən yol salıb ,
Xiyabanlar , döngələr.
Gözlə bir az , az qalıb ,
Gözlədiyin gün gələr.
Biz səninik , sən bizim ,
Mənim gözəl Təbrizim.
Sərvər Məsum
