Azərbaycan
mədəniyyətinin və adət-ənənələrinin formalaşmasında islam dininin böyük rolu
olub. Din-insanları hiss üzvləri ilə dərk edilən dünya gerçəkliyi arxasındakı
daha əhəmiyyətli gerçəkliklə bağlayan yoldur. Bu yol insanlara gözəl əxlaq
sahibi olmağı, yaxşılıq etməyi, pislikdən çəkinməyi öyrədən Allah yoludur.
Allah sevgisinə qovuşduran yoldur. İnsan dünya həyatında hər şeyin ötəri, keçəri
olduğunu görür: doğulur, yaşa dolur, qocalır, ölür. Din insan həyatının ən
mühüm təzahürlərini – ailədə və məişətdə davranış qaydalarını, əxlaq
normalarını, əməyin təbiətə, cəmiyyətə, dövlətə münasibəti müəyyən edir. Din
Allaha itaətdir. Bu gün dünyada ən geniş yayılmış dinlərdən biri olan İslam
artıq XIV əsrdir ki, öz mənəvi dəyərləri, əxlaq və hüquq normaları, mədəniyyət
qurmaq qüdrəti öz ardıcıllarının həyatını adət-ənənələrini, davranış və düşüncə
tərzini müəyyən edir, onlara dünya duyumu və mənəviyyatın təməlini təşkil edən
meyarlar verir. Bu müddət ərzində Azərbaycan xalqı da başqa müsəlman xalqaları
kimi İslam dəyərlərindən bəhrələnmiş, bu dini saflaşdırıcı mədəni ənənələrindən
təsirlənmişdir. İslamın əsas mənbəyi Quran sayılır. Müsəlman cəmiyyətinin
qayda-qanunları, əxlaq normaları, mədəni dəyərləri bu kitabda cəmlənib. Quranın
əqidə, ibadətlər, əxlaq və şəriət məsələləri ilə bağlı hökmləri müsəlmanların
din və dünya işlərini təmin edir. Göründüyü kimi, Allah-taala İslamın modeli
olan, dinimizin əsası sayılan Qurani-Kərim vasitəsi ilə adət-ənənələrimizi
insanlara çatdırır. Bəs niyə biz ilahi kitab olan Quranda qeyd edilənlərə riayət etmirik? (Mən dəfələrlə Buzovnada yas mərasimlərində
iştirak etdiyim zaman məclisdəki dindarların
əksəriyyəti kəndin axundu Hacı Soltan haqqında rəğbətlə danışdıqlarını
eşitmişəm). Bu məqsədlə Buzovna kəndinin axundu, Qafqaz Müsəlmanları Dini idarəsinin
qazisi Hacı Soltan Hüseynqulu oğlu Əlizadəyə müraciət etdik.
-Hacı,
Qurani-Kərimdə dünyasını dəyişən əzizlərimizin dəfn mərasimləri barədə nə
deyilir?
-Quranda
Allah-Taala tərəfindən dünyasını dəyişənə
dinimizə vacib olan beş şey buyrulur: üzünü qibləyə çevirmək, yumaq, kəfənləmək,
meyit namzı qılmaq, dəfn edəndə təlqin etmək. Böyük İslam alimlərinin fikirlərinə görə, şəriətdə üç gün ərzində
dünyasını dəyişənin yaxın adamları yemək gətirə bilər. Ancaq indi görürsən ki,
ölü yiyəsi bilmir ki, əzizinin dəfn mərasimini yerinə yetirsin, yoxsa ərzaq,
çadır, qab-qacaq dalınca getsin. Yas mərasimlərində ehsan vermə adəti əfsuslar
olsun ki, dinimizdə yarışma halına çevrilib. Sankiu dünyasını dəyişənə ehsan
verməmək böyük bir qəbahət və hörmətsizlik əlaməti hesab olunur. Belə olan təqdirdə
yas sahibləri borca girir və məcburi ehsan meydana çıxır ki, bu da İslam mədəniyyətinə
ziddir. Biz peyğəmbərin buyurduğu yolla getməliyik. Əzizi dünyadan köçən
insanın dərdinə şərik olmalıyıq. Əksər halda borcla mərasimləri təşkil etmək, dəbdəbəli
məzar inşa etmək dinimizdə doğru deyil. Dinimizə görə dəbdəbəli ehsanlar, qəbirlər
yanlışdır. İslamda israf qadağan edilir, bu, dinimizə uyğun deyil. Əfsuslar
olsun ki, yas mərasimlərini aparan mollalar da dinimizdə yasaq olanlardan
danışmırlar. Dəbdəbəli ehsan məclislərinin verilməsi, süfrələrin açılmasında məclisi
aparan mollaların irad tutması çox vacibdir. Nəzərə alsaq ki, regionlarımızda
dünyasını dəyişənlərə üç, yeddi, qırx, əlli iki gün hüzür saxlanılır. Yas mərasimləri
əhalinin toplandığı yerdir, yaxşı olardı ki, xalq arasında tanınmış alimlərimiz,
müəllimlərimiz israfçılığa qarşı öz münasibətlərini bildirsinlər. Cümə
axşamlarını çay, qənd, limonla keçirmək olar. İslamda su da ehsan sayılır. Nəzərə
alsaq ki, ham ıeyni gəlirə, maddi imkana malik deyil və dünyasını dəyişən əzizlərimizə
oxunan və edilən dualardan başqa heç nə çatmır. Bunun əksinə olaraq yol salmaq,
su çəkmək, bir imkansızın övladını oxutmaq, ona təhsil vermək çox böyük savab
iş sayılır və hamı o şəxsin dünyasını dəyişənlərə rəhmət diləyər. İslam dinində
yalan, xəyanət, riyakarlıq yoxdur. İslamda mərhəmət, həyat eşqi, bərabərlik
var.
Təəssüf
ki, Təzəpir məscidinin mərasim zallarında süfrəyə halva ilə bərabər noğul,
marmelad və şirniyyat verilir. Bunlar azmış kimi, süfrəyə mandarin, alma, armud
və üzüm qoyulur. Deyilənə görə, mərasim süfrəsi adambaşına 12-15 manata başa gəlir.
Şadlıq saraylarında olduğu kimi, "yedi var, apardı yoxdu”. Bəs, belə süfrələrin
açılması israfçılıq deyilmi? Deyirlər
ki, hər gün yolunuzu qəbiristanlıqdan salın ki, axirət yerinin ora olduğunu
unutmayasınız. Belə isə qəbirlərin ətrafına təmizlik üçün qoyduğumuz hər nə
varsa, ələlxüsus Qaradağ rayonunda orda işləyənlər – gündə neçə məzar qazanlar
tərəfindən oğurlanır və hələ də orada mal-qara otarılır. Axund Hacı Soltandan
bunun səbəbini soruşduqda: - Əlbəttə ki, qəbirləri ziyarət etmək, ölümü, axirəti
düşünmək və orada uyuyan ölülərin bağışlanması üçün Allaha dua etmək dinimizin
tövsiyyə etdiyi əməllərdəndir. Deməli, qəbir və türbələri ziyarət etməkdə məqsəd
ibrət almaq, axirəti xatırlamaqdır. Məzarlıqlara qoyulan əşyaların oğurlanması
isə xoşagəlməz haldır. Məzarlıqlar ən müqəddəs yer sayılır. Əzizlərimiz, müqəddəslərimiz
bu torpaqda uyuyur.
Bu gün qəbiristanlıqlara
dini təhsili olmayanlar, oxuduqları duaları düzgün tələffüz etməyənlər cəmləşiblər.
Ölənlərə və onların sahiblərinə hörmət əlaməti olaraq İslam Universitetinin tələbələrinin
bu işi icra etmələri məqsədəuyğundur. Nəzərə çatdıraq ki, tarixi abidə sayılan
Əjdərbəy məscidində və Mir Möhsün Ağa ziyarətgahında dilənlərin sayı ziyarətçilərdən
çoxdur. Nəzərə alsaq ki, bu yerlərə xarici vətəndaşlar da gedir, belə xoşagəlməz
hallar təcili aradan qaldırılmalıdır. Bunların əksinə olaraq, Buzovna kəndində
olarkən yeddi kənd məscidində, Əli ayağı ziyarətgahında dilənənləri və nəzir
qutularını gprmədik. Bunun ən böyük səbəbkarı görkəmli din xadimi, klassik ədəbi
irsimizin fəal tədqiqatçısı və təbliğatçısı, şair, axund Hacı Soltan Hüseynqulu
oğlu Əlizadəninn zəhmətinin bəhrəsi olduğunu söylədilər. Buzovnaya qədəm basarkən
mağaza satıcıları, avtobus sürücüləri, əksər kənd camaatı axundun islam mədəniyyətinin,
əxlaqının, dünyagörüşünün təbliğində böyük xidmətləri olan müdrik insan
olduğunu bildirdilər. Axund gözəl avaza, səlis nitqə malik olmaqla Qurani Kərimdən
surələri və hədisləri əzbər söyləyir. Hacı Soltanın böyüklüyü – vəzifəsindən,
var-dövlətindən asılı olamayaraq hər bir dünyasını dəyişən kənd sakininin hüzr
məclisində iştirak etməsindədir. Hacı
Soltan həmçinin bildirdi ki, İslam maarifləndirici bir məktəbdir. O, hicab
haqqında bunları dedi: Mədinə şəhərində bir cavan oğlan hicabsız olan naməhrəm
bir qadına baxarkən başı divara dəyir və ölür. Bundan sonra Quranda Hicab ayəsi
meydana çıxır. Hacı hətta "Dədə Qorqud” filmində kəlağayı örtüyünü misal gətirdi,
baş örtüyü, hətta yaşmaq da ədəb, ehtiram əlamətidir, örtüyün böyük gigiyenik əhəmiyyəti
də var. Kişilərdə də papaq milli geyimdir. Hacı Soltan orta məktəblərdə
ilahiyyat dərslərinin keçirilməsini məqsədəuyğun hesab edir.
Buzovna
kəndində gəzdiyim məscidlərdən birində divara vurulmuş şir və yanında müqəddəslərdən
birinin təsviri nəzərimi cəlb etdi. Bunun səbəbini axund Hacı Soltandan
soruşduqda belə izah etdi: İmam Əlinin şirlə rəmzini müqayisə edirlər, şirin
qorilla kimi güclü bədəni güclü olsa da, fil ondan da güclü olsa da, əsl şirdə
olan on bir müsbət xüsusiyyət var ki, bunlar imam Əliyə (ə) məxsus olan cəhətlərdir:
1.Şir ac olmasa, ov etməz. 2.Ov etdikdə, ehtiyacı olduğu qədər götürər. 3. Ov
vaxtı ən güclü heyvanı seçər. 4. Hamilə heyvanı ovlamaz. 5. Ovladığı heyvandan
birinci öz ailəsinə verər. 6. Heç vaxt başqasının artığını yeməz, yediyinin
qalığını gizlətməz. 7. Hiyləylə pusqu qurmaz. 8. Meydana tək gedər. 9. Fərarilik
etməz. 10. Vuruşdan qaçmaz. 11. Şir qocaldıqda öz sürüsündən uzaqlaşar. İslam dinində iki bayram – Qurban bayramı və
Ramazan bayramı var. Əksər yerlərdə bu iki bayram arası Qara bayram kimi də
qeyd edilir. Həmin qara bayram günü ölən insanların yaxınları ölənin evinə
başsağlığına gedirlər və bu bayramı hüzünlü şəkildə keçirirlər. Bu adəti hətta
Novruz bayramında da edirlər. İslam dinində belə bir adət yoxdur. Peyğəmbərimiz
bildirib ki, bayram günündə sevinərlər, nəinki yas tutmaq, oruc tutmaq da
qadağan edilib. Əgər bayram günlərində oruc tutmaq qadağan edilirsə, yas
saxlamaq, bayramı yas havasında keçirmək dinimizə ziddir. Bunların əvəzində qəbiristanlığa
gedib, əzizlərimizin məzarlarını kol-kosdan təmizləmək daha savabdır. Yaddan
çıxarmaq olmaz ki, bayramda insanlar sevinir, qohumlarını, yaxınlarını ziyarət
edər, dua oxuyarlar. Biz də çalışırıq ki, qara bayramı birdəfəlik ləğv edib,
onu məzarlıqlara yönəldək. İslam dini xalqımızı birliyə, mehribanlığa, ləyaqətə,
şərəflə yaşamağa dəvət edir – deyə Hacı Soltan Əlizadə bildirdi. Axund Hacı
Soltan Əlizadə 40-a yaxın ədəbi, dünyəvi divanın, dini kitabların müəllifidir.
"Qarabağ azad olan gün”, "Azərbaycan yaşasın”, "Vətən”, "Şuşa”, "Ana dilimdir”,
"Şah İsmayıl Xətai”, "Seyid Əzim Şirvani”, "Ömər Xəyyam”, "Sədi Şirazi”, "Hafiz
Şirazi”, Qarabağ müharibəsində şəhid olanlara, Azərbaycanın qəhrəman
oğullarına, idman sahəsində qələbə çalan gənclərimizə həsr etdiyi çoxlu sayda
şeir və qəzəlləri var. Hacının "Azərbaycan bayrağı” şeirindən bir hissəni diqqətinizə
çatdırıram:
Başımızın
tacıdır Azərbaycan bayrağı,
Hər
bayraqdan ucadır Azərbaycan bayrağı!
Uca
Tanrı Hacıya Zeynəb xanım, Ələviyyə xanım, Zəhra xanım və Yaxşı xanım kimi dörd
qız övladı bəxş edib. Hacı Soltan həyat yoldaşı Hacı sara xanımla birlikdə
övladlarını elmli, bilikli, tərbiyyəli böyüdüblər. Axund bildirir ki, elm
İslamda vacib şərt hesab edilir, çünki elm peyğəmbərdən qalıb, mal-dövlər
firondan. Axirətdə mal-dövlətin hesabları verilir. Sən var-dövləti qoruyursan,
elm isə səni qoruyur.
Təhminə
MUXTARQIZI
"Azad Azərbaycan" qəzeti