Səudiyyə Ərəbistanın dəstəklədiyi Yəmən hökumətinin qüvvələri Şəbva əyalətinin bütün rayonlarını Birləşmiş Ərəb Əmirliyinin dəstəklədiyi separatçı qüvvələrdən geri alıb.
GunAz.az əl-Ərəbiyyə telekanalına istinadla xəbər verir ki, Yəmən hökumətinin qüvvələri (müvəqqəti paytaxtı Ədən şəhəridir) Şəbva əyalətinin bütün rayon və qəsəbələrini o cümlədən strateji İtq rayonunu və burada yerləşən hərbi qərargahları separatçı "Cənubun Keçid Şurası" qüvvələrindən geri alıb.
Məlumata görə separatçıların bir sıra qüvvələri o cümlədən "Şəbva çevik qüvvələrinin altıncı briqadası" separatçılardan ayrılaraq, hökumət qüvvələrinin sıralarına keçdiyini elan ediblər.
Hazırda Yəmənin cənubunda müvəqqəti hökumətlə (prezident Abdu-Rabbih Mansur Hadi Səudiyyədədir) separatçı "Cənubun Keçid Şurası" qüvvələrinin döyüşləri Ədəndə, Təiz və Əbyən əyalətlərində davam edir.
Səudiyyə Ərəbistanı və BƏƏ-nin qarşıdurmalarla bağlı təşkil etdiyi birgə komissiya tərəfləri döyüşləri dayandırmağa və vahid cəbhə təşkil edərək, husilərə qarşı döyüşməyə çağırıb.