İyulun 26-dan 30-dək Rusiyanın Qərbi Sibir bölgəsində - Tümen şəhərində Ədəbiyyat üzrə dördüncü “LiFFt” Ümumrusiya Festivalı keçirilib.
GunAz.az xəbər verir ki, festivalda “Əcnəbi müəllif” nominasiyası üzrə bir neçə xarici yazar da qalibiyyət uğrunda mübarizə aparıb.
Festivala “Çovdar çörəyi” romanı ilə qatılan azərbaycanlı yazıçı Əlibala Məhərrəmzadə “Əcnəbi müəllif” nominasiyasında gümüş medala layiq görülüb. Yazıçımız V. Muravlenko adına “Neftyannik” mədəniyyət sarayında Tümen vilayəti administrasiyası, mədəniyyət xadimləri, diaspora nümayəndələrinin iştirakı ilə keçirilən mükafatlandırma mərasimi zamanı üçrəngli bayrağımızı dalğalandırıb.
Festivalın qızıl medalına isə şair, bard, rus aryerqardının aparıcı fiquru, kurtuaz manyerizm ədəbi cərəyanının lideri, moskvalı Viktor Pelenyaqre layiq görülüb.
Qaliblərə medalları və diplomları festivalın prezidenti Marqarita Al, Rusiya Millətlər Assambleyası İcraiyyə Komitəsinin sədri Nazirjon Abduqaniev, habelə üçüncü Ümumavrasiya “LiFFt” Festivallar Festivalının qızıl mükafatçısı, həmyerlimiz Varis Yolçuyev təqdim edib.
Xatırladaq ki, ədəbiyyat üzrə dördüncü Ümumavrasiya “LiFFt” Festivallar Festivalı bu il sentyabrın 30-dan oktyabrın 4-dək Bakı şəhərində keçiriləcək.
