"Avropanın üç ölkəsində şirkətlər, hətta Ukraynada zavod və kombinat açan bir icra başçısının ciddi korrupsiya araşdırması tələb edən fəaliyyəti barədə dəfələrlə faktlar, sənəd-sübutlar təqdim etmişik. Söhbət Qubanın tamahı və əməlləri böyük "balaca kralı" Ziyəddin Əliyevdən gedir".
Qaynarinfo xəbər verir ki, bu sözləri sosial şəbəkəsindəki hesabında jurnalist Cavanşir Həsənli yazıb.
"Deməli, Ziyəddin Əliyev bu qədər ifşa olunandan sonra bu ilin aprelin 1-də Mikolayevskdə, İvan Mazeli 21/5 ünvanında SMANBUD TOV, yəni MMC qeydiyyatdan (şəhadətnamə nömrəsi 42809651) keçirib. Bu şirkət də yol tikintisi sahəsində fəaliyyət göstərməyə başlayıb.
Düzdür, şirkət Hacıyev Vüqar İsgəndər oğlunun adına rəsmiləşdirilib. Bu şəxs Ziyəddin Əliyevin Ukraynadakı şirkətlərini idarə edən əsas adamıdır və icra başçısının rəhbərlik etdiyi rayonun Maliyyə İdarəsinin müdiri olan Hacıyev Ruslan İskəndər oğlunun qardaşıdır. Hansı ki, Ziyəddin Əliyev Mikolayevskdə ilk dəfə "Alov” zavodunu açarkən də məhz onu direktor təyin etmişdi.
Beləliklə, Ziyəddin Əliyevin Ukraynadakı şirkətlərinin sayı 6-ya, ümumən xaricdəki şirkətlərinin sayı 8-ə çatıb:
1. ALOV ASFALT ZAVODU
2. MİKOLAYEV-LVOV İNŞAAT ŞİRKƏTİ
3. "ALOV" MƏHDUD MƏSULİYYƏTLİ CƏMİYYƏTİ
4. "ALOV TİCARƏT EVİ" MƏHDUD MƏSULİYYƏTLİ CƏMİYYƏTİ
5. "ALOV-BUD" MƏHDUD MƏSULİYYƏTLİ CƏMİYYƏTİ
6. SMANBUD MƏHDUD MƏSULİYYƏTLİ CƏMİYYƏTİ".