Gürcüstan hökuməti Rusiyanın Bakı-Tiflis-Qars dəmir yoluna qoşulmasını istəmir.
GunAz.az xəbər verir ki, bunu politoloq Elxan Şahinoğlu qeyd edib. O, Gürcüstanın Türkiyə-Azərbaycan-Rusiya arasındakı yeni sazişdən narahat olduğunu bildirib:
“Ankarada bir neçə gün əvvəl imzalanan Türkiyə-Azərbaycan-Rusiya sazişi Bakı-Tiflis-Qars dəmir yolu üzrə yükdaşımaların inkişafını nəzərdə tutur. Bu arada, Rusiya Dəmir Yolları İdarəsinin rəhbəri Oleq Belozyor Bakıya gələrək prezident İlham Əliyevlə görüşüb. İki ölkə arasında dəmir yolu ilə yük daşımalarının həcmi artır. Bu ilin ilk 3 ayında yük daşımalarının həcmi 25 faiz artıb. Rusiya Bakı-Tiflis-Qars dəmir yolu ilə Türkiyəyə yük daşımaları həyata keçirmək istəyir. Bunun əksi də mümkündür. Yəni Türkiyə öz mallarının bir hissəsini Bakı-Tiflis-Qars dəmir yolu ilə Rusiyaya daşıya bilər. Ancaq Gürcüstan hökuməti Rusiyanın Bakı-Tiflis-Qars dəmir yoluna qoşulmasını istəmir”.
Politoloqun fikrincə, dəmir yolunun bir hissəsi Gürcüstandan keçdiyindən rəsmi Tiflis bu məsələdə söz sahiblərindən biri olduğunu göstərməyə çalışır:
“Halbuki bu dəmir yolunun tikintisi üçün 1 dollar belə xərcləməyib, yenə bizdən borc alıb. Gürcüstan hakimiyyəti bilir ki, bu cür daşımalar Azərbaycan və Türkiyə üçün faydalıdır. Yəqin Tiflis bizdən yenə nəsə qoparmaq istəyir. Rusiyanın Bakı-Tiflis-Qars dəmir yolundan istifadəsinə razı olmayan Gürcüstan hakimiyyətindən soruşmaq lazımdır ki, bəs necə olur Rusiya Ermənistana mallarını Gürcüstan üzərindən daşıyır, necə olur illərdir Abxaziya üzərindən dəmiryolunun açılmasıyla bağlı Moskva ilə danışıqlar aparılır?”.
Qeyd edək ki, bir neçə gün əvvəl Ankarada Türkiyə-Azərbaycan-Rusiya sazişi imzalanıb. Saziş Bakı-Tiflis-Qars dəmir yolu üzrə yükdaşımaların inkişafını nəzərdə tutur.
