Bakı Humanitar Kollecinin akt zalında
"Qarabağ qaziləri” və "Xankəndi” ictimai birliyinin təşkilatçılığı ilə Azərbaycanın
Milli Qəhrəmanı, şəhid polkovnik-leytenant Şirin Mirzəyevin anım günü
keçirildi. Tədbirdə millət vəkilləri, QHT rəhbərləri, şair və yazıçılar,
Qarabağ müharibəsi veteranları, müəllim və tələbələr iştirak etdilər. Dövlət
Himnimizin səsləndirilməsi ilə başlayan tədbiri Azərbaycanın ilk hərbi diktoru,
vətənpərvər mahnıların ifaçısı Şəmistan Əlizamanlı açdı və vətən uğrunda, sərhədlərimizin
qorunmasında döyüşərək şəhid olmuş soydaşlarımızın xatirəsi bir dəqiqəlik
sükutla yad edildi.
Əslən Şuşanın Mirzəli kəndindən olan Şirin
Vəli oğlu Mirzəyev 1947-ci il yanvarın 5-də Xankəndində anadan olub. 1967-ci
ildə Sankt-Peterburq Ali Siyasi Hərbi Məktəbini, 1988-ci ildə Hərbi Siyasi
Akademiyanı bitirərək uzun illər Sovet ordusunda xidmət etmişdir. O, 1991-ci
ildə Azərbaycanda ilk nizami özünümüdafiə taboru yaradaraq alay komandiri kimi
Ağdam rayonunun müdafiəsində, ayrı-ayrı yaşayış məntəqələrinin erməni
quldurlarından təmizlənməsində böyük qəhrəmanlıq göstərmişdir.
Şirin Mirzəyev 1992-ci ilin iyun ayının
18-də Sırxavənd istiqamətində aparılan döyüşlər zamanı minaya düşərək həlak
olmuş, iyunun 20-də Bakıda Şəhidlər Xiyabanında dəfn edilmişdir. Ölümündən
sonra Azərbaycanın Milli Qəhrəmanı adına layiq görülmüş polkovnik-leytenant
Şirin Mirzəyevin döyüş yolu ən ağır bölgələrdən keçib. Onun sərkərdəlik və yüksək
təşkilatçılıq qabiliyyəti sayəsində Naxçıvanik, Pircamal, Ağbulaq, Dəhraz, Fərrux,
Qaraşlar, Bəşirli, Sırxavənd, Ballıqaya və digər kəndlər erməni quldurlarından
azad edilmişdi. O, Ağdam rayonunun 120 kilometrlik cəbhə xətti ilə yanaşı,
qonşu rayonların da bir sıra mühüm yaşayış məntəqələrinin erməni quldurlarından
müdafiəsinə rəhbərlik etmişdir.
Tədbirin aparıcısı onu da bildirdi ki, 18
iyun 1992-ci ildə Şirin Mirzəyevlə yanaşı 708 saylı briqadanın tank komandiri
baş leytenant Qahir Hüseynov (ölümündən sonra "Azərbaycan Bayrağı” ordeni ilə təltif
edilib), 836 saylı alayın xüsusi təyinatlı zərbə hücumu dəstəsinin komandiri
leytenant Yavər Babayev, Mübariz və Araz Mirzəyev də (hər ikisi Şirin Mirzəyevin
yaxın qohumlarıdır) şəhid olublar.
Sonra Qarabağ qazisi Rey Kərimoğlunun ssenarisi
əsasında çəkilmiş "Diqqət, mən üç üz birəm” sənədli filmi nümayiş olundu. Filmdə
sabiq müdafiə naziri Valeh Bərşadlının, eləcə də qəhrəmanın döyüş dostlarının
kövrək xatirələri tədbir iştirakçılarında qürur hissi oyatdı.
Millət vəkili Aqil Abbas Azərbaycanda ilk
nizami ordu yaradan Şirin Mirzəyevin qəhrəmanlığından, cəsurluğundan iftixarla
danışdı.
Orta məktəb şagirdi Fidan Məmmədova "Sən
qalib gələcəksən” şeirini söylədi.
İgid sərkərdə Şirin Mirzəyevin həyat
yoldaşı Flora Qasımova tədbir iştirakçılarına dərin minnətdarlığını bildirərək
dedi: "40 yaşında körpə uşaqlarını mənə etibar edərək döyüş bölgəsinə gedən
Şirin Mirzəyevi saxlamaq qeyri-mümkün idi. Onunla bir sinifdə, eyni partada
oturardıq. Son dərəcə qabiliyyətli idi. Gözəl rəsmlər çəkərdi. Hər gün kitab
oxuyardı. Mütaliədən qalmazdı. Sözübütöv, dürüst idi. Allahdan cəmi şəhidlərimizə
rəhmət diləyir və Şirin Mirzəyevi bu gün də unutmayan döyüş dostlarına, millət
vəkillərinə, hər kəsə təşəkkürümü bildirirəm”.
"Şəmistan Əlizamanlının ifa etdiyi vətənpərvər
ruhlu marş mahnıları hər kəsdə xoş ovqat yaratdı.
Tədbirin sonunda Xan Şuşinskinin səsləndirilən
bənzərsiz Qarabağ şikəstəsi” sınıq qəlblərə sanki məlhəm səpərək bizi qələbəyə
- Şuşaya, Qarabağa səsləyirdi.
Rauf İlyasoğlu,
Şəhid
Ailələrinə Sosial Dəstək və Beynəlxalq Əlillər Cəmiyyəti
İctimai Birliklərinin Mətbuat Xidmətinin rəhbəri
