Kompüter, internet icad olunandan sonra elə bil insanlarda da bicləşmə dövrü başladı. Rus demişkən: "vızıv” atanlar, kontur oğurlayanlar peyda olaraq telefon istifadəçilərinin cibinə girirlər.
Çörək
bişirənlər kündəni kəsərək camaata atış gələndə, xarici ölkələrdən mənşəyi
bilinməyən məhsullar, geyilmiş paltarlar gətirilərək MEMİ-lərdə şıdırğı alver
gedəndə əlbəttə ki, cəzasızlıqdan istifadə edən, Bakcell və Azercell şirkətləri
də konturların dəqiqələrini kəsməklə vətəndaşları narazı salmağa başlayırlar.
Fürsəti fövtə verməyən diribaş işbazlarımız süni düyülər, saxta dərmanlar gətirməklə
insanları zərərli məhsullarla zəhərləyirlər. Görəsən hüquq-mühafizə orqanları,
eləcə də sərhəd xidmətində yüksək çinli məmurlar hara baxırlar?
Kələkbaz şirkətlər daha irəli gedərək Rabitə və
İnformasiya Texnologiyaları Nazirliyinə xod taparaq öz xidmət növlərini təsdiqlədərək
hər bir Bakcell istifadəçilərinin əl telefonuna müdaxilə etməyə başlayırlar.
Son bir ildir ki, əl telefonuma hər dəfə kontur yükləsəm
də, beş-on saniyə danışdıqdan sonra operatorun: "balansınızda kifayət qədər
kontur qalmayıb” səsli mesajı ilə rastlaşıram. Axır ki, Bakcell-in Elmlər
Akademiyası ərazisindəki xidmət sahəsinə yaxınlaşdım. Operator dedi ki, siz
"Vialink” xidmət növünə qoşulduğunuz üçün 2016-cı ildən hər gün 24 qəpik
kontorunuzdan tutulur.
Operator bildirdi ki, "Vialink” şirkətinə zəng edin.
Biz bu şirkətlərə müdaxilə edə bilmirik. Çünki belə fırıldaqçı xidmət növləri
xalqın cibini soyur. "Vialink”in rəhbəri Rabitə və İnformasiya Texnologiyaları
Nazirliyi ilə "dil taparaq” qeydiyyatdan keçib və əl telefonlarına müdaxilə edərək
Bakcell istifadəçilərinə mənasız, duzsuz suallar verərək, onları bu şəbəkəyə
qoşurlar. Nəticədə vətəndaşlar aldanır. Bir tərəfdən sələmçi banklar, digər tərəfdən
isə Bakcell və Azercell vasitəsilə işbaz şirkətlər telefonumuza girib, əsəblərimizə
müdaxilə edirlər. Belə şirkətlər insanları bezdirib. Nəhayət, 012-404-86-60-nə
zəng edib məsələni aydınlaşdırmağa çalışırıq.
Operator qız cavab verir ki, siz "Vialink” xidmət
növündən bir ildir ki, istifadə edirsiniz. Bir dəfə hansı giləmeyvə haqqında
soruşmusunuz. O vaxtdan şəbəkəmizlə əlaqə saxlayır və bizim abunəçimizsiniz.
Operator xanımı başa salmağa çalışıram ki, ay xanım, mən
millətin dərd-qəmindən yazıram, hansı giləmeyvə? Nəhayət, operator qız təmkinlə
"9567STOP” yazın, bu xidmət növündən istifadəniz kəsilsin, - deyib telefonu
üzümüzə qapadı. Təkrar nə qədər zəng etsəm də, nömrə məşğuldur deyə saatlarla
gözləməli oluruq.
Rabitə və İnformasiya Texnologiyaları Naziri bir
vaxtlar vətəndaşların telefonlarını güdməklə keçmiş Milli Təhlükəsizlik
Nazirliyinə işverənlik edirdi.
Bu gün isə məqsədli şəkildə, reklam xarakterli
mesajlarla insanları bezdirən xoşagəlməz halların qarşısını görəsən kimlər
alacaqdır?
Rauf İlyasoğlu
