Novella Hər gün arvadı öz doğmaca ərinin
üstünə qışqıraraq uşaqlarının yanındaca gününü göy əsgiyə bükürdü:
-Ay külbaş! Bir qazandan üç
dəfə yeyirsən. Yemə də ba! Get qazan, gətir. Küçüklərini saxla. Bax, bir qonşulara! Hansı
qonşu sənin kimi dolanır? Səni mənə calayanın qələmi qırılaydı, ey! Bazar od tutub yanır. Maaşın yavan çörəyə ancaq çatır. Çörəyin də qiymətini
artırdılar, get yaşa görüm necə yaşayırsan? Adına bir dünya işıq, qaz, su pulu yazılıb.
Get ödə görüm necə ödəyirsən? Bir də gördün gəlib ya işığımızı kəsdilər, ya da qazımızı.
Tifillərim soyuqdan ölər ki?
Dövlət işığa olan borcu bir dəfə ləğv etdi, ağzında şirə qaldı? Elə bilirsən
yenə ləğv edəcək? İndi biznes zamanasıdır. İnstitut-ministitut boş şeydir. Get qazan
gətir. Kapitalizm nə deməkdir? Kapital yığmalısan. Öləndə bir kəfən pulun olmalıdır,
ya yox? Odey! İşbazlar ərzaq məhsullarını da qaldırdılar. Gözün aydın. Aldığın tula
payı ilə dolan görüm, necə dolanarsan?
Fikirləşmə ki, jurnalistlərə tikilən təzə binada sənə də ev verəcəklər, ay,
hay, ölmüşdü Xankişi!
Bir küncə qısılmış yazıq kişi isə böyük bir günah işlətmiş
adamlar kimi köks ötürüb sanki huşa keçmişdi. Yadına bir vaxtlar "Kommunist” qəzetində
işləməyi düşdü. O vaxtlar hər yazıya qiymət verilərdi. Aldığı məvacib ailəsini o
ki, var dolandırardı. Hələ qonararı demirəm. Hər yazıya əməlli-başlı pul da alardı.
Kitab çıxardan 2 il rahat dolanardı. Elə ki ara itdi, məssəb qarışdı, öz vətənində
didərgin, köçkün həyatı yaşayan Nazim, erməni quldurlarının təcavüzü, fitnəkarlığı
nəticəsində Qarabağdan Bakıya pənah gətirdi. Valideynləri yurd nisgilinə, erməni
özbaşınalığına, öz məmurlarımızın laqeyidliyinə dözə bilmədilər.
Bir il ərzində hər ikisi dünyasını dəyişmiş, bu zərbə Nazimi
daha da sarsıtmışdı. Bir yandan da arvadının haqlı deyinməsi onu tam hövsələdən
çıxarmışdı. Bir vaxtlar Gülnigarla Nazim bir-birini necə sevər, can deyib can eşidərdilər.
Qayğısız, atalı, analı günlər yaşayardılar.
Uşaqlar böyüdükcə ailənin vəziyyəti get-gedə ağırlaşırdı.
Nazim nüfuzlu bir qəzetdə çalışsa da, məvacibi çox aşağı idi. Sovetdən qalma qonorar
isə bu qəzetdə, demək olar ki, ləğv olunmuşdu. Redaksiyada 3-4 nəfər bəy kefində
dolanar, qalan işçilərin isə maaşdan maaşa gözlərinə bir balaca işıq gələr, tez
bir zamanda yenə də kasıb işçilərin yaşamaq həvəsi sönərdi. Nazim özünü oda-közə
vursa da, dələduzluğu bacarmır, pul qazanmaq səriştəsi demək olar ki yox dərəcəsində
idi. Halallığı uca tuturdu. Arvadı isə elə hey deyinirdi:
– Odey, qonşu əlli yerdə əlli arvad saxlayır. Piyaniskə
köpəyoğlu olsa da, uşaqlarını gör necə dolandırır. Zərqələmin üstündə bəlkə də bir
kiloqram qızılı, brilyantı var. Görürsən də, yanıyla qovurğa dağıdır. Hər dəfə mənə
acıq verib deyir:
– Allah ərimə dəyməsin. Oxumaqla deyil ey, gərək bəxtin
olsun. Ərim heç texnikum da qurtarmayıb. İrana gedib gəlir, benzin paylayır. Maşınındakı
çəninin dibində qalan benzini hər gələndə çəkib sorur qablara, yığıb satır, özüm heç onuncu sinifi də
bitirməmişəm. Ərim pul qazanan kişilərdəndir ey!
Ay kişi, sən də, mən də universitet qurtarmışıq. Bu qədər
əziyyət çəkmişik. Alver edə bilmiriksə demək ölməliyik? Hamı alverlə, ticarətlə
məşğuldur. Çıx qəzetdən! Get, daş daşı, evə pul gətir, uşaqlar ac qalmaqdan mədəsin
tutub zarıyırlar. Heç sənin insafın yoxdur! Nə tutmusan bu nəşriyyatdan?
Arvadın haqlı tələbinə Nazimin heç bəhanəsi də yox idi.
Səhhəti ona əl vermirdi ki, ağır işdə işləsin. Axı, revmatizmadan çox əziyyət çəkirdi.
Nazimin yadına bir vaxtlar «Yaşıl» bazarda piştaxta arxasında alver edən Zərqələmin
hərəkətləri düşdü və öz-özünə fikirləşdi.
Zərqələm əlli hoqqadan çıxdı. Nə olsun? Adamın bəxti olsun,
ey! Sən də yapışmısan bu qəzetdən.
Nazim çox fikirləşdi.
– Uşaqları ya adam kimi dolandırmalıyam, bir çarə tapmalıyam,
ya da…
Nazimin köhnə dostları kasıb balaları idilər. Müasir dostları
işi düşəndə, Nazimə yaltaqlanan, ona əl tutmaqdan uzaq adamlar idilər. Arvadı get-gedə
əsəbiləşir, sözünün başın-ayağın bilmirdi:
-Uşaqlarını ya adam kimi saxla, ya da gəl boşanaq, çıx
rədd ol, bilim ki, təkəm, iki yerdə işləyib uşaqları dolandırım. Dümbəyimə yamaq
deyilsən ki? Bu cür təhqiramiz söhbətlərdən təngə gələn Nazimin ürəyinə xal düşmüş,
qara, şəvə saçları seyrəlmiş, tez bir zamanda dümağ ağarmışdı. Ürəyindən küt ağrısı
getməyən Nazimin bu halına yanan Hüseyn adlı bir tanışı bir gün ona dedi:
– Əyə! Qəzetdən nə qədər pul alırsan?
– 200 manat
– Gəl səni aparım, bizneslə məşğul olan xozeynimin yanına.
Bağında həm qalarsan, həm də işləyərsən.
– Hüseyn! Bilmək olar o nə işdir elə?
– Əşşi nə iş olacaq Xozeynimin itinə baxacaqsan. Gündə
üç dəfə yemək verəcək, özün nə yesən, artığın da evə gətirərsən. 600 manat məvacibin.
Üstəlik də itin ad günündə, xozeynin şad günündə əlavə mükafatın, pay-puşun, cib
xərcliyin və s. də olacaq. Nəşriyyatdan min dəfə yaxşıdır. İtə gündə nəçə kilo banan
yedizdirəcəksən. Hər gün uşaqların banan yeyəcək. İtə verilən bahalı yeməkdən oğurlama,
ha!.. Birdən bilməzsən, balığın sümüyünü təmizləməmiş itə verərsən, ha!.. İtin çöpü
qalar, xozeyinim səni «nakazat» edər. Həftədə bir dəfə boynu qırxıq gədələr xarici
avtomobillərdə gələrək iti sevgilisi ilə görüşdürməyə aparacaqlar. Onda bir saat
rahat dincələ bilərsən.
Yorulmaq bilmədən yazıb yaradan, neçə kitab müəllif olan
Nazim çox fikirləşdi. Fikirləşdi ki, bu qəzet işçilərinə nə vaxtsa bir gün ağlayan
tapılacaqmı? Səbri tükənmişdi. Çox düşündükdən sonra qəti qərara gəldi. Öz-özünə
götür-qoy elədi: «Odey, professor Hətəmov müəllimliyi atıb, nazir balasının bağında
bir cüt xaricdən gətirilmiş hündürboylu itə qulluq edir. Bir il ərzində qartın-qurtun
düzəldib. Təzə binalardakı mənzillərdən ev də alıb. Sən isə köhnə daxmada hələ ki,
çürüyürsən. Elə bilirsən ki, çox yazmaqla səni kimsə sayacaq?»
Hələ ki, torpağımız işğal altındadır. Uşaqlara gün ağlamalıyam.
İtə qulluq edə-edə körpələri birtəhər böyüdüm. Allah kərimdir, – deyə Nazim çox
fikirləşdi.
Bu minvalla işdən çıxmaq haqda ərizə yazan Nazim könülsüz
halda nəşriyyata gəldi.
Əməkdaşlar bir-birini təbrik edir, sevinirdilər.
Dövlət qəzetində çalışan işçilərin
əmək haqqları 2 dəfə artırılmış və onlara dövlət qulluqçusu statusu verilmişdir.
Yazıçısı və şairlərin qonorar məsələsi Milli Məclisdə gündəmə gəlmişdi. Qərar ürəkaçan
idi.
Nazim sevincək yazdığı ərizəni iki bölüb zibil qabına tulladı.
Cibində pulu olmasa da, ümidini Allaha bağlayan jurnalist arvadını sevindirmək və
muştuluqlamaq üçün fıştırıq çala-çala evə tələsdi və öz fıştırığına qəflətən yuxudan
dik atıldı.