Füzulinin Bala-Bəhmənli kəndi yaxınlığında yerləşən sərhəd zastavasında, İrandan ölkəmiz istiqamətində dövlət sərhədini pozan Müşfiq Quluzadə saxlanılıb.
GunAz.az xəbər verir ki, ilkin araşdırma zamanı sərhəd pozucusunun 2017-ci ildən ölkəmizdə hüquq-mühafizə orqanları tərəfindən axtarışda olduğu müəyyən edilib. Həmçinin “Astara” dövlət sərhədində İrandan ölkəmizə gələn İran vətəndaşları Bahonar Bastak Abad Salah Salehin və Yousefkikani Şirzad Aminin üzərinə sərhəd və gömrük baxışı keçirilib. Bu zaman onların daxili orqanlarından 630 qram narkotik vasitə aşkar olunaraq götürülüb. Dövlət Sərhəd Xidmətinin və Daxili İşlər Nazirliyinin əməkdaşlarının birgə keçirdiyi əməliyyat nəticəsində İran vətəndaşlarını qarşılayan Astara rayon sakini Qadir Cavadov da saxlanıb. Keçirilən digər əməliyyat zamanı Xaçmazın Yalama kəndi yaxınlığında yerləşən sərhəd zastavasında Rusiyadan ölkəmiz istiqamətində dövlət sərhədini pozan Kamran Bayramov saxlanıb. Onun 2012-ci ildən etibarən hüquq-mühafizə orqanları tərəfindən axtarışda olduğu müəyyən edilib. Hər 3 cinayət faktı ilə bağlı aidiyyəti üzrə əməliyyat-istintaq tədbirləri davam etdirilir.
N.SAFURA