Tələbə xaricdə təhsil alıbsa, onu bir məmur imtahan etməməlidir. Təhsil Nazirliyi elektron qaydada müraciətlə bu məsələni həll edə bilər.
GunAz.az xəbər verir ki, bunu Milli Məclisdə (MM) Nazirlər Kabinetinin 2018-ci ildə fəaliyyəti haqqında hesabatın müzakirə olunduğu plenar iclasda AMEA-nın müxbir üzvü, millət vəkili Musa Qasımlı bildirib.
Millət vəkili deyib ki, xaricdə təhsil alanların diplomlarının tanınması məsələsi ilə bağlı çox söz-söhbət gəzir.
“Təhsil Nazirliyi xaricdə təhsil alanı çağıraraq yox, həmin xarici ölkəyə elektron qaydada sorğu göndərərək həmin şəxsin sərhədi keçib-keçmədiyini, təhsil alıb-almadığını müəyyənləşdirə bilər”, - deyə o bildirib.
Millət vəkili Elmi Müdafiə Şuraları ilə bağlı tənqidi fikirlər səsləndirib:
“Elmi Müdafiə Şuralarının həmsədrliyində ciddi dəyişikliklər edilməlidir. Heç bir məqaləsi çıxmayan şəxslər həmsədr kimi fəaliyyət göstərirlər. Bu, Azərbaycan elminə ayıbdır. Elmi Müdafiə Şuralarını “anekdot” yerinə çevirməməliyik”.
N.SAFURA