Qüdrətli ordunun ZƏFƏR SALNAMƏSİ
Mahir HÜSEYN
26 İyun – Silahlı Qüvvələr Günü: Qüdrətli Ordunun Zəfər Salnaməsi
Azərbaycan xalqı hər il 26 iyun tarixini böyük qürur və ehtiram hissi ilə qeyd edir. Bu gün müstəqil dövlətimizin təhlükəsizliyinin, suverenliyinin və ərazi bütövlüyünün əsas təminatçısı olan Azərbaycan Ordusunun yaranma günüdür. Silahlı Qüvvələr Günü təkcə hərbi bayram deyil, həm də dövlətçilik tariximizin, milli həmrəyliyimizin və vətənpərvərlik ruhumuzun təntənəsidir.
Şanlı tarixin başlanğıcı
Azərbaycan Ordusunun təməli 1918-ci il iyunun 26-da Azərbaycan Xalq Cümhuriyyəti tərəfindən qoyulub. Həmin gün Əlahiddə Azərbaycan Korpusu yaradıldı və bu hadisə milli ordumuzun formalaşmasının başlanğıcı kimi tarixə düşdü. Cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti milli dövlətçilik ənənələrinin əsasını yaratdı və peşəkar milli ordu quruculuğuna start verdi.
Sovet hakimiyyəti illərində bu ənənələr müəyyən qədər zəifləsə də, xalqımız müstəqilliyini bərpa etdikdən sonra milli ordu quruculuğu yenidən gündəmə gəldi. Lakin 1990-cı illərin əvvəllərində ölkədə mövcud olan siyasi böhran, idarəetmədəki xaos və pərakəndəlik güclü ordunun formalaşdırılmasına ciddi maneələr yaradırdı.
1993-cü ildə xalqın təkidli tələbi ilə hakimiyyətə qayıdan ümummilli lider Heydər Əliyev dövlət quruculuğu ilə yanaşı, ordu quruculuğunu da prioritet vəzifələrdən biri elan etdi. Məhz onun rəhbərliyi altında nizami ordu formalaşdırıldı, vahid komandanlıq sistemi yaradıldı, hərbi intizam gücləndirildi və Silahlı Qüvvələrin maddi-texniki bazasının möhkəmləndirilməsi istiqamətində mühüm addımlar atıldı.
1998-ci ildə Heydər Əliyevin imzaladığı fərmanla 26 iyun tarixi rəsmi olaraq Silahlı Qüvvələr Günü elan edildi. Bu qərar Azərbaycan Ordusunun tarixində yeni mərhələnin başlanğıcı oldu.
Son illərdə Azərbaycan Ordusu regionun ən güclü hərbi qüvvələrindən birinə çevrilib. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən həyata keçirilən məqsədyönlü siyasət nəticəsində ordunun döyüş qabiliyyəti əhəmiyyətli dərəcədə yüksəlib.
Müasir silah və texnikaların alınması, hərbi sənaye kompleksinin inkişafı, peşəkar kadr hazırlığı, beynəlxalq təcrübənin tətbiqi və sosial təminat sahəsində həyata keçirilən tədbirlər Azərbaycan Ordusunu dünyanın qabaqcıl orduları sırasına çıxarıb.
Bu gün Azərbaycan Ordusu yalnız say baxımından deyil, həm də texnoloji imkanları, döyüş hazırlığı və peşəkarlıq səviyyəsi ilə seçilir.
2020-ci ildə baş vermiş və Azərbaycanın parlaq qələbəsi ilə başa çatan İkinci Qarabağ müharibəsi Azərbaycan Ordusunun qüdrətini bütün dünyaya nümayiş etdirdi. 44 gün ərzində Ali Baş Komandanın rəhbərliyi altında həyata keçirilən uğurlu hərbi əməliyyatlar nəticəsində işğal altında olan torpaqlarımız azad edildi.
Şuşanın azad olunması müharibənin taleyini həll edən ən mühüm hadisələrdən biri oldu. Azərbaycan əsgərinin qəhrəmanlığı, zabit və generalların peşəkarlığı, xalqın dövlət ətrafında sıx birləşməsi tarixi Zəfərin əsas amillərinə çevrildi.
Bu qələbə təkcə hərbi uğur deyil, həm də milli qürurun, tarixi ədalətin və beynəlxalq hüququn bərpası idi.
2023-cü ildə həyata keçirilən lokal antiterror tədbirləri nəticəsində Azərbaycanın bütün ərazisində dövlət suverenliyi tam təmin edildi. Bu proses bir daha göstərdi ki, Azərbaycan Ordusu qarşıya qoyulan istənilən vəzifəni yüksək peşəkarlıqla yerinə yetirməyə qadirdir.
Bu gün Azərbaycan bayrağı ölkənin bütün ərazisində qürurla dalğalanır və bunun arxasında minlərlə şəhidin qanı, qazilərimizin qəhrəmanlığı və Azərbaycan əsgərinin fədakarlığı dayanır.
Şəhidlərimizin əziz xatirəsi
Silahlı Qüvvələr Günü həm də Vətən uğrunda canlarını fəda etmiş şəhidlərimizin xatirəsini ehtiramla yad etmək günüdür. Azərbaycan xalqı şəhidlərini heç vaxt unutmur, onların qəhrəmanlığı gələcək nəsillər üçün vətənpərvərlik məktəbi olaraq yaşayır.
Qazilərimizin göstərdiyi şücaət və fədakarlıq da dövlətimiz tərəfindən yüksək qiymətləndirilir. Onların sosial müdafiəsi və qayğı ilə əhatə olunması dövlət siyasətinin mühüm istiqamətlərindən biridir.
26 İyun – Silahlı Qüvvələr Günü Azərbaycan dövlətçiliyinin gücünü, xalq-ordu birliyini və milli həmrəyliyi təcəssüm etdirən əlamətdar tarixdir. Bu gün Azərbaycan Ordusu regionun ən güclü ordularından biri kimi ölkəmizin təhlükəsizliyini etibarlı şəkildə qoruyur.
Silahlı Qüvvələr Günündə Vətənimizin keşiyində dayanan bütün hərbi qulluqçularımızı təbrik edir, şəhidlərimizin əziz xatirəsi qarşısında baş əyir, qazilərimizə möhkəm can sağlığı arzulayırıq.
Yaşasın Azərbaycan Ordusu! Yaşasın müstəqil Azərbaycan!