Milli Ruhun Səsi: Aşıq Novruz Qazaxlı və Onun Saz Dünyası

Azərbaycanın qədim saz-söz beşiyi olan Qazax mahalı tarix boyu böyük ustadlar, qüdrətli söz sərrafları yetişdirmişdir. Bu müqəddəs torpağın suyunu içib, havasını udan, ruhunu sazın tellərində tapan sənətkarlardan biri də Aşıq Novruz Qazaxlıdır. O, təkcə ifaçı deyil, həm də milli dəyərlərimizi, əxlaqi keyfiyyətlərimizi şeirlərində yaşadan milli ruhlu bir şairdir.

Uşaqlıqdan Gələn Sevgi: Saza Bağlı Ömür

Aşıq Novruzun sənət yolu hamar olmayıb, lakin onun saza olan sevgisi bütün maneələri aşıb. Qazax mahalında dünyaya göz açan sənətkarın hələ uşaq yaşlarından qəlbində aşıq sənətinə böyük bir məhəbbət yuva salıb. O illərdə maddi imkansızlıq ucbatından şəxsi sazı olmasa da, bu, onu ruhdan salmayıb.

Balaca Novruz el şənliklərində, məclislərdə sazı sinəsinə basıb, barmaqlarını tellərə toxunduranda sanki başqa bir dünyaya düşürdü. Saz almağa pulu olmasa da, tanrının ona bəxş etdiyi istedad və daxili yanğı onu səhnələrə, məclislərə çəkirdi. Beləcə, o, saza, şeirə, elin-obanın söz xəzinəsinə qırılmaz tellərlə bağlandı.

Göylərə Uzanan Yol və Sazın Sədası

Maraqlı həyat yolu keçən Aşıq Novruz hazırda paytaxt Bakıda yaşayır. O, fəaliyyətini Azərbaycanın nüfuzlu təhsil ocaqlarından olan Milli Aviasiya Akademiyasında davam etdirir. Həyatını müasir texnologiya və elm mühitində keçirsə də, ruhundakı "Qazaxlı" kimliyi və saz sevgisi heç vaxt azalmayıb. Əksinə, o, müasir dövrün qayğıları içərisində milli mənəviyyatımızı qoruyan bir qala kimi çıxış edir. Hikmət Dolu Misralar Aşıq Novruz Qazaxlının yaradıcılığı nəsihətamiz, tərbiyəvi və dərin fəlsəfi məzmunu ilə seçilir. Onun şeirlərində böyüyə hörmət, valideyn haqqı, dostluq sədaqəti və mərdlik kimi mövzular əsas xətti təşkil edir.

Onun bu yaxınlarda (23.11.2025) qələmə aldığı yeni şeiri də məhz bu yüksək insani keyfiyyətləri təbliğ edir. Şair oxucunu halallığa, təmkinli olmağa və köklərinə bağlı qalmağa səsləyir:

Həsihət

Halallıq al doğmalardan,
Ağıll topla sakit dolan,
Bağışlanmaq bir Allahdan,
Bir də dədə-babandan al..

Ana haqqın itirmə gəl,
Dost -düşməni güldürmə gəl,
Doğmaların incitmə gəl,
Mərifəti qanandan al.

Yerli-yersiz çatma qaşın,
Cahilliyin sən at daşın,
Ağrıyarsa əgər başın,
Dərdə dəva loğmandan al.

Aşıq Novruz gəlmir hədə,
Unutmaz evladın dədə,
Çəkilməsin adın bəd də,
Layiqli dərs atandan al.

Son Söz Əvəzi

Aşıq Novruz Qazaxlı bu gün sazı və sözü ilə gənclərə örnək olur, keçmişlə gələcək arasında mənəvi körpü yaradır. Onun yaradıcılığı sübut edir ki, insan harada yaşamasından və harada işləməsindən asılı olmayaraq, milli kimliyini və kökünü unutmamalı, onu yaşatmalıdır.

Bilman İSAQ

Geri qayıt