Azərbaycanın gələcəyi üçün 5 böyük layihə...
Azərbaycanın gələcəyi üçün 5 böyük layihənin həyata keçirilməsi çox vacibdir və bu addımlar indiki hökumətdən sonra da mütləq atılmalıdır, çünki, Dövlət adlanan institutun 10-15-20, hətta 50 illik vizionu, planları olmalıdır.GunAz.az xəbər verir ki, bu barədə iqtisadçı Natiq Cəfərli qeyd edib.
O, Azərbaycanın uzunmüddətli iqtisadi və geosiyasi maraqlarına xidmət edən beş mühüm layihəni sadalayıb:
1. Zəngəzur dəhlizinin açılması və ümumilikdə Cənubi Qafqazda bütün nəqliyyat və kommunikasiya xətlərinin işlək vəziyyətə gətirilməsi;
2. Türkmənistandan Azərbaycana qaz boru kəmərinin çəkilməsi;
3. Qazaxıstandan Xəzər dənizinin dibi ilə neft boru kəmərinin inşası;
4. Azərbaycanın enerji “hub”-u və logistika mərkəzi olması ilə yanaşı, ölkənin neft emalı mərkəzinə çevrilməsi üçün böyük zavodların inşası və yenidən qurulması – Azərbaycan xam neft satan ölkədən, öz neftinin və Qazaxıstan neftinin emalı mərkəzinə çevrilməlidir. Bir barrel neftin emalından əldə olunan gəlir, bir barrel xam neftin satışından 7-8 dəfə çoxdur;
5. Azərbaycanın regional “bazara” çevrilməsi baş verməlidir, bunun üçün “aşırı tənzimləmə” qaydaları, içiboş və mənasız dövlət nəzarət edici qurumların bir çoxu ləğv edilməli, yeni vergi-gömrük qanunvericiliyi işlənib hazırlanmalıdır.
Ekspertin fikrincə, bu addımlar Azərbaycanın iqtisadi müstəqilliyini və beynəlxalq mövqeyini möhkəmləndirəcək:
“Əgər indiki hökumət bu layihələri reallaşdıra bilməsə, gələcəkdə hakimiyyətə gələcək qüvvələr bu strateji yol xəritəsinə əməl etməlidir. Bu, ölkənin ən azı 50 illik inkişafını təmin edə bilər”.