Səhər saatlarında Bakı-Sumqayıt yolunda ağır yol-nəqliyyat hadisəsi baş verib. Hadisə Bakıdan Sumqayıta hərəkət edən sərnişin avtobusunun yük maşınına çırpılması nəticəsində baş verib. Qəza yerinə yol polisi və təcili-tibbi yardım maşınları cəlb olunub. Qəza nəticəsində Sumqayıt Dövlət Universitetinin tələbəsi İbrahim Quliyev, soyadı hələlik məlum olmayan daha iki tələbəsi həyatını itirib. Hadisə nəticəsində bundan əlavə 5 nəfər müxtəlif dərəcəli bədən xəsarətləri ilə xəstəxanaya yerləşdirilib. Avtobusun sərnişinlərinin hamısının tələbə olduğu bildirilir. Belə ki, qəzaya uğramış "Ford-tranzit" markalı mikroavtobus tələbələri Sumqayıt Dövlət Universitetinə aparırmış. Hazırda qəza səbəbindən həmin yolda tıxac yaranıb. *** Səhiyyə Nazirliyinin mətbuat xidmətinin əməkdaşı Səfayə Əhmədovanın verdiyi məlumata görə, 3 nəfər hadisə yerində dünyasını dəyişib. Ölənlərin hər 3-ü tələbədir. Xəsarət alan 5 nəfər Kliniki Tibbi Mərkəzə yerləşdirilib, vəziyyətləri ağırdır. Bakipost.az-un yaydığı videonu təqdim edirik.
