İsrailin işğal etdiyi İordan çayının qərb sahilindəki Beytullahim şəhərinin Takku mahalında "Anadolu" agentliyinin çəkiliş apardığı zaman Fələstinli gəncin İsrail əsgərləri tərəfindən öldürülməsi görüntüləri səs-küy yaradıb. 17 yaşlı Fələstinli Kusay Əl-Amurun işğalçı ordunun əsgərləri tərəfindən öldürülməsinə dair görüntülərin ortaya çıxmasından sonra İsrail ordusunda istintaq açılıb. İstintaq materialında öldürülən Əl-Amurun əsgərlərə qarşı "fitnəkar" hərəkətlər etdiyi iddia olunub. Xatırladaq ki, ötən həftənin bazar ertəsi günü Əl-Amurun İsrail rejimi əsgərləri tərəfindən öldürülməsi görüntüləri dünya mətbuatında yayıldıqdan sonra böyük narazılıq yaranmışdı.