Alqışların kölgəsində itən dəyərlər
Bu gün sosial media təkcə ünsiyyət vasitəsi deyil, həm də cəmiyyətin mənəvi simasını və düşüncə tərzini əks etdirən böyük bir platformadır. Təəssüf ki, bu platformalarda müşahidə etdiyimiz mənzərə son illərdə ciddi suallar doğurur. İnsanların özünü inkişaf etdirmək, biliklərini artırmaq və dünyagörüşünü zənginləşdirmək üçün istifadə edə biləcəyi bu imkanlar bəzən tam əks istiqamətdə yönəlir. Belə olan halda haqlı olaraq sual yaranır: Biz sosial mediada həqiqətən nəyi izləyir, nəyi dəstəkləyir və nəyi alqışlayırıq?
Cəmiyyət olaraq diqqətimizin bir hissəsi getdikcə intellektual inkişafdan, milli-mənəvi dəyərlərdən uzaqlaşaraq asan istehlak olunan məzmunlara yönəlir. Canlı yayımlarda və müxtəlif platformalarda etik normalara uyğun olmayan davranışların geniş auditoriya toplaması artıq sadəcə statistik göstərici deyil, eyni zamanda dəyərlər sistemimizlə bağlı düşündürücü bir siqnaldır. Normalda tənqid edilməli olan bəzi davranışların minlərlə bəyənmə və paylaşım qazanması həmin məzmunların daha da geniş yayılmasına səbəb olur. Beləliklə, bəzən fərqinə varmadan cəmiyyət üçün faydalı olmayan nümunələri populyarlaşdırmış oluruq.
Məsələnin daha vacib tərəfi isə bu prosesin gənc nəslin dünyagörüşünə təsiridir. Gənclər uğurun nə olduğunu məhz gördükləri nümunələr əsasında formalaşdırırlar. Əgər uğur anlayışı elm, zəhmət, peşəkarlıq və mənəvi dəyərlərdən uzaqlaşaraq yalnız sürətli şöhrət və asan qazanc üzərində qurulursa, bu, gələcək üçün ciddi narahatlıq doğurmalıdır. Çünki cəmiyyətin inkişafı təsadüfi populyarlıqla deyil, bilik, əmək və məsuliyyət hissi ilə mümkün olur.
Bu gün bir çox insan izlədiyi məzmunun cəmiyyətə təsiri barədə düşünmədən onu paylaşır və yayır. Halbuki hər baxış, hər bəyənmə və hər paylaşım müəyyən dəyərlərin dəstəklənməsi deməkdir. Sosial medianın formalaşdırdığı ictimai rəyin gücü nəzərə alınarsa, bu məsuliyyət daha da artır.
Əlbəttə, problem texnologiyanın özündə deyil. Sosial media düzgün istifadə edildikdə maarifləndirmə, təhsil və yaradıcılıq üçün mühüm vasitəyə çevrilə bilər. Əsas məsələ seçimlərimizdədir. Hansı məzmunu izlədiyimiz, hansı insanları nümunə göstərdiyimiz və hansı dəyərləri dəstəklədiyimiz gələcəyin cəmiyyətini formalaşdırır.
Unutmamalıyıq ki, ekran qarşısında etdiyimiz hər seçim sabah yaşayacağımız cəmiyyətin kiçik bir hissəsini qurur. Buna görə də alqışlarımızı və diqqətimizi qısa müddətli şöhrətə deyil, elmə, zəhmətə, mənəvi dəyərlərə və cəmiyyətə fayda verən insanlara yönəltməliyik. Sağlam gələcəyin təməli məhz belə seçimlər üzərində qurulur.
Səmayə Rəsulova
Jurnalistika ixtisası üzrə IV kurs tələbəsi
Jurnalistika ixtisası üzrə IV kurs tələbəsi