“Bütövlükdə tənqid yazan jurnalistlərə “reket” adı qoyub onların fəaliyyətini məhdudlaşdırmaq yolverilməzdir”
Bunu Moderator.az-a açıqlamasında tanınmış media eksperti Qulu Məhərrəmli deyib. Q.Məhərrəmli bildirib ki, əgər bir jurnalist kimdənsə pul qoparmaq üçün onu hədələyibsə, buna görə o, cəzalandırılmalıdır:
“Ümumi olaraq “reket” anlayışı kriminal aləmdən gələn bir sözdür və “reketçilik” bütün sahələrdə ola bilir. Yüksək vəzifəli şəxslərin adından istifadə edib bu cür əməllər törədilir. Ona görə də hesab edirəm ki, belə məsələlər cinayət hadisəsidir və bununla da hüquq-mühafizə orqanları məşğul olmalıdır. Belə “reket”lərin zərərsizləşdirilməsi media qurumları üçün də üstün bir cəhətdir ki, onun adından istifadə edilməsin. Təəssüf ki, Azərbaycanda son illərdə bu “reketçilik” cana-qana hopub, hərə bir sayt açıb bununla yüksək vəzifəli şəxslər haqda rüsvayedici məlumatlar yaymaqla onları qorxuzurlar. Əgər bir jurnalist kimisə hədələyibsə, ondan pul qoparmaq üçün bu cür addımlar atıbsa, bu, birbaşa “reketçilikdir” və o, buna görə cəzalandırılmalıdır. Yox, əgər həqiqətən də bir media qurumu araşdırma aparırsa, faktlar əsasında yazı yazırsa, bunu “reket” alandırmaq yalnışdır, belə halda bu mətbuat azadlığına basqıdır. Ona görə də “reketçiliklə” Mətbuat Şurası deyil, hüquq-mühizə orqanları məşğul olmalıdır. Əgər yazıda hansısa etik qaydalar pozulubsa, bununla bağlı Mətbuat Şurası məhkəməyə qədərki proseslərlə məşğul ola bilir. Bütövlükdə tənqid yazan jurnalistlərə “reket” adı qoyub onların fəaliyyətini məhdudlaşdırmaq yolverilməzdir”.
Vasif Əlihüseyn
