Sabunçu rayon Mərkəzləşdirilmiş Kitabxana sisteminin 9
saylı filialının müdiri Firəngiz Salmanovanın təşkilatçılığı ilə 10 saylı musiqi məktəbində «Həyatsevər şair» adlı müsiqili, əbədi-bədii gecə keçirildi.
Tədbirdə kitabxana işçiləri, musiqiçilər, orta məktəb şagirdləri,
şair və yazıçılar «Günaz.az» saytının, «Azad Azərbaycan» və «Həkəri» qəzetlərinin
redaktorları iştirak etmişlər.
Tədbir Molla Pənah Vaqifin həyat və yaradıcılığına həsr
olunmuşdur.
Sabunçu rayon 108 saylı tam orta məktəbin Azərbaycan dili
və Ədəbiyyat müəllimi Şəhla Qulamovanın hazırlaşdırdığı şagirdlərdən: Fərəcov Maqsun
– (Qacar), Həşimov Xalid – (Vaqif), Şahverənli Həsən – (Vəzir), Şirinov Ayaz – (Vidadi),
Əliyev Mirzağa – (Qapıçı), Məmmədağa Pünhan və Ağabəyov Ağabəy – (keşikçilər) rolunda
Səməd Vurğunun «Vaqif» dramından səhnələr nümayiş etdirdilər.
5-ci Muğam müsabiqəsinin diplomantı, Az.TV-nin solisti
Maşallah Mirzəliyev, tarda Həsənağa Səmədovun, kamanda Elnur Salahovun müşayiəti
ilə Molla Pənah Vaqifin qəzəllərindən və şeirlərinə bəstələnmiş muğam, təsnif və
mahnıları məlahətli səslə ifa etdi.
Sonra söz «Həkəri» qəzetinin baş redaktoru, tədqiqatçı,
«Günaz.az» saytının redaktoru, yazıçı, şair-publisist Rauf İlyasoğluya verildi.
Rauf İlyasoğlu
tədbirə dəvət etdiyinə görə «Günaz.az» saytının baş redaktoru, «Azad Azərbaycan» qəzetinin redaktoru Bilman Allahverdiyevə,
eləcə də tədbir iştirakçılarına təşəkkürünü bildirdi.
M.P.Vaqif yaradıcılığından geniş və ətraflı söhbət açan
Rauf İlyasoğlu sonra vətənpərvər ruhlu şeirlər söylədi. O, yenicə çap etdirdiyi
«Dünya şöhrətli alim, karikaturaçı rəssam, Kərim Kərimov» adlı miniatür kitabını
kitabxana filialına hədiyyə etdi və vaxtilə Maştağa sakinlərinin hələ 1918-ci ildə,
eləcə də 1990-1994-cü illərdə Qarabağda gedən müharibədə silah-sursat cəhətdən köməkliklərindən,
fədakarlıqlarından, eləcə də bu müqəddəs məkanda kəramətli seyid və üləmalardan
«Dost sədaqəti kitabında geniş bəhs etdiyini
bildirdi.
Jurnalist Bilman Allahverdiyev tədbir iştirakçılarına təşəkkürünü
bildirdi və bu cür görüşlərin tez-tez keçirilməsinin əhəmiyyətindən danışdı.
Sonra xatirə şəkli çəkildi və bu tədbir hər kəsdə xoş ovqat
yaratdı.
Rauf İlyasoğlu