Münsifləri şoka salan qardaşlar: "Məqsədimiz "Ginnesin rekordlar kitabı"na düşməkdir"

Çıxışlarımız haqda çox danışmağa icazəmiz yoxdur. Bizi şounun yaradıcı heyəti dəvət edib. Onlarla yanaşı dörd-beş ölkədən də dəvət almışdıq. Qərar verdik ki, ən məşhurunu seçək.
Bu sözləri axşam.az-a açıqlamasında qubalı pəhləvan Laçın Abdulhüseynov deyib.
Qardaşı Hüseynlə birlikdə ABŞ-da "America Got Talant"a qatılan pəhləvan məqsədlərinin "Ginnesin rekordlar kitabı"na düşmək olduğunu söyləyib:
"Gürcüstandakı "Talant" şou, Türkiyədə "Yetenek sizsiniz" bizi dəvət edib. Hindistanın "Dünya Rekordlar Federasiyası"ndan da dəvət almışdıq. Hələ fikrimizdə "America Got Talant" yarışmasıdır. Qarşıda yeni nömrələrimiz var. Bu dəfə qorxulu səhnələr olmayacaq. Amma "Ginnesin rekordlar kitabı"na daha qorxulu çıxışlar hazırlayırıq. Onlar qorxulu səhnələri xoşlayırlar. Yüz faiz əminəm ki, bu kitaba düşəcəyik. Bəzi nömrələr var ki, dünyada göstərilib. Biz həmin rekordları birdəfəyə təzələyəcəyik. Eyni zamanda da dünyada görünməyən çıxışlar edəcəyik".
L.Abdulhüseynov bəzi çıxışlarının yayımlanmadığını söyləyib:
"Çıxışlarımız onları çox qorxutdu. Ona görə də bir neçə hissəni kəsiblər. Ukrayna ilə müqayisədə bunlar ürəyizəifdilər. Çünki Ukraynada şou zamanı daha qorxulu nömrələr göstərirdik.
Deyirlər ki, "Ginnesin rekordlar kitabı"na düşəndə ayda 1 milyon pul ödəyirlər, ilk dəfəyə yüz min verirlər. Bunlar yalandır. Onlar şoulara pul qarşılığında qatılmağa və kinolara çəkilməyə şərait yaradırlar".
Pəhləvan çıxış zamanı yaralandıqlarını da deyib:
"Belə hallar tez-tez olur. Başla zərbə vurduğumuz üçün zədə almışdıq. Artıq sağalmışıq".