Tural İlqar oğlu Salmanzadə 16 iyun 1993- cü il tarixində Masallı şəhərində anadan olub. 1998-ci ildən Bakı şəhərinə köçmüş və burada Suraxanı rayonu Qaraçuxur qəsəbəsində yerləşən Milli Qəhrəman Cavanşir Rəhimov adına 146 saylı orta məktəbdə təhsil almağa başlamışam və 2009- cu ildə həmən məktəbi bitirib Azərbaycan Dövlət İqtisadiyyat Universitetinin İnformatika və idarəetmə fakültəsinə qəbul olub. 2011-2013-cü illərdə hərbi xidmətdə olub. O, Universiteti əla qiymətlərlə bitirib.
Tural Salmanzadə kiçik yaşlarından idmanla məşğul olub. Alpaqut idman növü ilə məşğul olana qədər Yunan- Roma güləşi, kyokuşin karate ilə məşğul olub və hər iki idman növündə böyük uğurlar əldə edib. Amma bir neçə ildir ki, Alpaqut Turan döyüş sənəti yaranandan, daha doğrusu qeydiyyatdan keçəndən sonra Alpaqutla məşğul olur.
Bu idman növünə gəlməsi ilə bağlı Tural İlqar oğlu Salmanzadə belə dedi:
- 2016-cı ildə Azərbaycan Alpaqut Federasiyasının hakimlər kollegiyasının sədri Teqin Elşən Məmmədovla tanış olduq və o məni bu döyüş növünə qoşulmağa dəvət etdi. Təbii ki, ilk öncə bu sənət barəsində araşdırma apardım, mənə tələbələrimə və cəmiyyətə xeyirli olduğunu gördüm və bu idman növünün öz doğma vətənimizin, öz millətimizin döyüş sənəti olduğu üçün Alpaquta qoşulmağa qərar verdim. 2018-ci ildən isə Alpaqut Turan döyüş sənəti üzrə keçirilən bütün yarışlarda hakimlik etmək hüququ qazanmışam, bir neçə ölkə daxili və beynəlxalq yarışlarda vuruşmuşam, ən son yarışım 2019- cu ildə Bakıda keçirilən Alpaqut üzrə ikinci dünya çempionatında Aypara sistemi üzrə çempionluğa nail olmuşam. 2018-ci ildən Azərbaycan Alpaqut Federasiyasının Suraxanı rayon filialının sədri vəzifəsinə rəhbərlik edirəm. Artıq 4 ildir ki, döyüşçü fəaliyyətim ilə yanaşı həm də məşqçi kimi fəaliyyət göstərir, uşaqlara, gənclərə Vətənimiz üçün, Dövlətimiz üçün necə Alpaqut olmağı aşılayıram. Axı bizim Vətənimizin 20 faiz torpaqları erməni gavurları tərəfindən işğal altındadır. Ona görə də biz, Vətənimiz üçün çox güclü, qoçaq gənclər yetişdirməlyik. Alpaqut mənə elə gəlir ki, bu sahədə daha təkmil idman növüdür. Çünki bu idman növü ilə məşğul olan hər bir gənc çox asanlıqla qarşısındakı adamı məğlub edə bilir. Hətta onu ölümcül vəziyyətə belə sala bilir. Əgər Qarabağ uğrunda döyüşlər olsa, bizim idmançılar orada böyük uğurlar əldə edə bilərlər. Çünki onlar çox çevikdirlər. Həm də çox yüksək, bütöv xarakterə malikdirlər.
Söhbət əsnasında mən onu da öyrəndim ki, Tural Salmanzadə kyokuşin karate üzrə birinci Dan qara kəmər sahibi və Alpaqut Turan Döyüş Sənəti üzrə birinci San qara kəmər sahibidir. Artıq 2016- cı ildən məşqçi kimi də fəaliyyət göstərən Tural Salmanzadə çoxlu respublika çempionları, beynəlxalq turnirlərin qalibləri və dünya çempionları yetişdirib.
Qarşıda Alpaqut üzrə 3- cü dünya çempionatının Türkiyənin Bursa şəhərində bu ilin noyabr ayında həyata keçirilməsi planlaşdırılır. Həmin yarışda Azərbaycan idmançıları da yüksək səviyyədə iştirak edəcəklər. Biz inanırıq ki, həmin yarışdan idmançılarımız böyük qələbələrlə qayıdacaqlar. Biz ona da inanırıq ki, Tural Salmanzadə yenidən özünün dünya çempionu titulunu qoruyub saxlayacaq. Çünki o, təkcə özü yox, həm də yetirmələri artıq həmin yarışa çox əzmkarlıqla, böyük həvəslə hazırlaşırlar.
Azərbaycan Alpaqutçuları! Bu yarışda da sizə böyük uğurlar arzu edirik.
İlhamə MƏHƏMMƏDQIZI
