Sərvər Məsum
Uzaq dayan qeylü-qaldan,
Düşmən vurur sağdan , soldan ,
Bölünməkdən düşdün haldan,
Nədir bu hal , Azərbaycan !?
Qövr eyləyən yaran dərin,
Geri dönmür gedənlərin,
Pusu qurub düşmənlərin,
Qurur xəyal , Azərbaycan !
Təbriz , Bakı çox təkləndi,
Artıq səbrimiz tükəndi,
Ayrı düşən min-min kəndi,
Qoynuna al , Azərbaycan !
Qoy aradan getsin yadlıq,
Yenə artsın sevinc , şadlıq,
Bu istiqlal , bu azadlıq,
Olsun amal , Azərbaycan !
Səda salsın bu düyün-toy,
Bakı , Təbriz , Naxçıvan , Xoy,
Torpaqların birləşsin qoy,
Sən bir yol al , Azərbaycan !
Ər igidlər dursun başda,
Dilə gəlsin dağ da , daş da,
Düşmənlərlə bu savaşda,
Qələbə çal , Azərbaycan !
