ABŞ Prezidenti Barak Obama Çikaqo şəhərində vida çıxışı edib. 8 illik hakimiyyət dövrünə nəzər salan Obama ölkənin bu müddətdə inkişaf etdiyini deyib. Tez-tez demokratiyadan bəhs edən ABŞ prezidenti ölkədə fərqli irqlər arasında münasibətlərin əvvəlki illərə nisbətən bir qədər dəyişdiyini bildirib. Xarici siyasətlə bağlı çox az danışan Obama nədənsə bütün dünyanın müzakirə etdiyi, Demokratların ən çox tənqid olunduğu Suriya mövzusunda bir kəlmə də kəsməyib. Obama yaxın Şərqdə yaranan problemlərə də toxunmayıb. O, yalnız Kuba, İran və Üsamə bin Ladenin adını çəkərək bu problemlərin hakimiyyəti dövründə öz həllini tapdığını bildirib.
