Son dövrlər "Apple" şirkətinə məxsus cihazlarda müəyyən problemlər üzə çıxıb.
Gunaz.az xəbər verir ki, Hindistandan gələn bir mesaj telefonların çökməsinə səbəb olub. Hindistanda 70 milyon insanın istifadə etdiyi bir dil olan Teluqu dilindəki bir simvol kompüter, planşet və smartfonların xarab olması ilə nəticələnib.
"Apple iOS 11.2.5" və ya "MacOS" işlədən qurğularda baş verən xətalar səbəbindən "Apple"in "iMessages", mesaj sistemi, "WhatsApp", "Facebook Messenger", "Gmai"l və "Outlook for iOS" kimi tətbiqləri çökür və sistemlər müntəzəm olaraq xəta verərək istifadə edilməz hala gəlir. Proqramların bu simvola uyğun olmaması səbəbindən tətbiqlər öz-özünə bağlanır. Mütəxəssislər isə, "əgər bu mesajı görsəniz, açmadan silin",-deyirlər.
"Apple" bu problemi "iOS 11.3" yeniləməsi ilə ortadan qaldıracağını bildirib.
